|
Pierre Savorgnan de Brazza, vestasik, bak 1852 koe Roma ve kobliyir aze bak 1905 koe Dakar ve awalkeyer. Pasuson va guazafa italiafa yasa, tuke nendara ke Montaignac rambik in wetce diveik ko Brest Biratotarafa Bema az francafa birarpolia ve koaweyer. Bal totara wetce pomarafayik ke Quiliot rambik (1873-1874), va Gabona worayar. Abduaskiyinon wetce totararikulik, bak 1875 va vuida ta vestara va Ogooue ve seotayar acum do Marche tuwavopik is Ballay selaropik is Hamon totaralevfayik ve mallapiyir ; Marche me ve rotartlapiyir. Va Ogooue inaf dositikeem ve tidlapiyir : vestason va kenexoeem ise xultuson va jontika volfakaca ise nepaleson va serolilu ke irubasikeem. Brazza va Ogooué? kuksaxo ve remigayar aze va Alima is Licona kovoa se ke Congo ve kosmayar ; vexe me grupeyer da lion poke bat bostap tiyir acum arte 1300 km ko Gabona ve dimlapiyir. Ba dimpira ko Franca in zo tufrancayar. Givayanon icde kosmakseem ke Stanley ise grupeson va vakoreem weyonas va totara moo titefo Congo, va keldonara van bost mal Gabona francafo digixo in ve gorayar. Ba 27/12/1879 vuidayanon gan Divexo Elda ve mallaniyir aze va Ogooue ve tidlapiyir aze koe kovoa ke Passa va Franceville recela ve reduyur (6-aksat 1880).
In va Stanley Pool uzdaka ve azon kallaniyir aze va Makoko gazik ve gorayar ta battan va int rundayar koe nendareba ke Franca (03/10/1880) ; kene bost va recela yoltatana kan Brazzaville ve reduyur aze va Malamine levfayik koeon ve iskeyer. Va Congo ve porfeon titlapiyir aze va Stanley ve kakeveyer aze bak 12-aksat 1880 ko Gabona ve artlapiyir. Bak 1881 va Alima play ve reduyur, azon va Niari kuksa ve titlapiyir, va tela lotrelafa kelda wale mialukafo Congo is krimt (1882). Bak 6-aksat 1882 koe Franca in tiyir lize va seramafa rekluera ve kazawayar. Inafa taniafa abdikerelera ta tarutera va kota koboda kev patctikeem, is opafa adala ke abickane geltran vestareem ravalduyud tori in va vamoeaca varze Stanley? dan dum kevlik va in ve askipeyer ise ve tizon lutsagayar. Batu ovakiskafu lijkilu, kire kosmakseem ke Brazza me denon tir rodolunhen do tel ke Stanley, va saneilu ke Brazza ve anton tulogijayar.
Maga pu in va erbonasiki ve brudayar ; in wetce totararikulik al abduaskiyir, azon bak 3-aksat 1883 do Sokasaneramisavik vergumvelt ve tolpiyir. Bak 3-aksat 1884 va Makoko ve kazokeveyer pu dano va gruyera va bioga ke 1880 ve tusaneayar, aze va Alima ve vestayar aze ko Franca ve dimpiyir aze ko Berlin laxa wetce ckanef pirdasik zo ve stakseyer. Bata bareafa brinuga, lotorigirapafa dam tela abdifa se, va maletiksap yo ve nasbayar, ke dan porilu va dokobasikeem ke Brazza pakon malpir ; jontika recela zo ve reduyud ise patcta zo ve vestanhayar ise inaf robeem zo ve vayanhayad. Brazza ko boniaxo ve tolpiyir ta da va in bower ; ta da warzafa koboda se kev Biratotara Elda zo rotaruteyed, taneilu kapbure bowesik va Gabona pu in ve zo vanziliyir. Brazza ve wiyir va intaf dugeem ke ristusik gan boniaraf seltomap se dan di kiewaskiyid ta da bak 1898 in zo asgriflir. Bak 1905 dimpiyison ko Congoa, inafa vuida tiyir kogrupara va lonjereem ke bat seltom se. Arti konak aksat dimpison ve awalkeyer.
|
|
Ara ava se
 Savorgnan de Brazza
 Savorgnan de Brazza
 Savorgnan de Brazza
 Savorgnan de Brazza
 Savorgnan de Brazza
 Savorgnan de Brazza
 Savorgnan de Brazza
|
