|
1. Tawavopa
1.1 Ugatawavopa
Remayano gan witalu ise mialon modivatceno gan aalxo, congoaxo va 342.000 km2 patar, kene taltefa domega ke Oubangui is tela ke Congo bost.
1.2 Fetinte is laveem
Fetinte ruldar va baroy belc : omafa Congoa, krimtafa mevtafa tixa (Mayombe fluvor), gola dem venta se is mevtama yo solparsasa va vwepafa krimtafa azeka (200 km kene Atlantika, lize Kouilou artar) sol istexo ; congoafa tcelda tazukasa va mialalavafa buxafa azeka ; adim, lentetalte bata wedafa gola, yootafa azekexa se (Batéké is Konkouya, 1.040 m koe Leketi mevta) solparsad va Congo kuksaxo sol Ogooue? tel koe Gabona. Modivatcen gan mella se, sin tid nhikoyan gan voaalxo se ik loba yo kene totaraf kovoeem ke Congo bost.
Bosteem is kukseem va toloy jumtakap pasud : va isteon is lenteon Congo tel is geroneon Kouilou-Niari tel. Congo (4.614 km) tir tel logijarotif tamavaf bost rade Amazonas. Klita tir koe Sokasanerotifa Congoa, in rustoler va Congoa Sokasane kene 700 km ise do intaf kovoeem va skapafa yordapa ksuber. Kouilou (320 km) kovoa isu Niari va talteka andud ; titesalt ke Kouilou tit totaraf.
1.3 Lidawicka is ruxeem
Lente patcta lidawicka tir witalufa is idulafa is abdafa, dem toloy rodaf cadim is toloy muvaf cadim. Tandafa mialukafa yanka tir 25°. Koe Getalteka lidawicka tir bwafa abdafa dem tanoy muvaf cadim (8 aksat) is tanoy rodaf cadimap (3-4 aksat). Koe Istexo lidawicka tir levwitalufa dem cupaf rodaf cadim. 65 % ke congoaxo tid bwaalxokirapaf. Talteon Chaillu fluvor is Mayombé is lentefo vamolavano aalxo tadled va toleaf aalxof ind ke tamava. Zavzaks ke tawavo tir mellakiraf.
2. Izva - Ko kotraf teliz : Izva ke Congoa
Taneaf irubasikeem va patcta al nuvelad Pigme? saneik se. Bak taneafa voldecitda, lentufa bantuavafa sanelia se azilnhofasa is tawamidurusa kenolanison va krimt is voeem va gola ve zomeyed. Konako gazaxo tadlewed. Sinafa xanta zo grupejer : Teke gazaxo lenteon koe istexo is konako Kongo gazaxo kene krimt is koe Mayombé fluvor.
2.1 Europafa koluwera
Bak 1482 Diogo Cão portugalaf vestasik, va Congo bostart ve zomeyer. Uzereem va patctolafa sanelia se ve tiyir volfakaf. Portugalik se? va ebeltikmordara ve tozuyud, acum batcoba va sanelia illaumapayar ise va gaderopafi koeti se is selt yo ke istefa Afrika tuvolbograyar. Tir koe bata saverorka da europik yo toz koluweyed moni 1875 gan Pierre Savorgnan de Brazza dana va Ogooue? bost ve tidlapiyir aze va ronefa domega ke Congo bost ve kosmayar.
Bak 1880 in ve zolteyer va Teke nafalik, Makoko gazik, va bioga ke nendareba joke Franca (1880). Azon, bak 1883, Cordier va bioga ke kagrupera do Loango gazaxo ve parleyer.
2.2 Francafa tuboniara
Francafa Puloda ve vlabeyer va dotrak ke Savorgnan de Brazza bak 1882, solve da Berlin laxa (1884-1885) va rokeem ke Franca kene ronefa domega ke Congo ve kagrupeyer. Vanpiyinon jadif ramisavik, Pierre Savorgnan de Brazza ko intafa rictuma va Congoa is Gabona ve katanayar, aze lenton va francaf digikseem ve divatceyer. Francafa Congoa boniaxo bak 1891 zo ve reduyur aze kaxaakskirafu sistu yo ta savera va robeem (loy is wula) va tawavo wale sint walziliyid. Batu sistu lonjepeyed, acum batcoba va forteyrujayana kevmadara se doimpayar.
Bak 1910 Brazzaville vanpir kelu ke francafa witalufa Afrika, ise vestayana gola se gan Brazza ton toloyo tawavo zo walziliyid : talteon Gabona is roneon Congoa. Bak 1911 kaxaakskirafu sistu se va telo lo intafo tawavo ve drasuyud. Kevboniarafa kategira kaikion exaksawetesa ve nariyir va tazuk ke kevotceraliziwera se. Vexe vedeyeva geltron anton ve tozuweyer radimi Toleafa tamavageja. Impavantason va lizukafa kevlaca yo, Fulbert Youlou eceyik ve askiyir da zo libuyur tori dotaf libureem ke 1956 ise va play ke taneaf eldik ke Sokasane vanmiae Francafa Witalufa Doda (1958) ve vansayar.
2.3 Volruptesuca
Ba 15/08/1960 va volruptesuca ve vansayar. Fulbert Youlou? wetce taneatisik ke Congoa Sokasane ve zo libuyur. Azon patcta va konaka vertumabetawera is gaderopafa adjubera se ve grupeyer aze mal marxlenineva kal skapafa nuyoteva ve remayar. Congoa Sokasane ve vanpiyir Congoa Sanefa Sokasane ba 1969. Radimi jadifa kevmadara bak 1990, warzafa tadlemwa ba 1992 zo ve vanikatcuyur ise do jonpakoeva vertuma al tolwebokar.
Enkruldesuca ke Congoa zo ve kowupeyer gan azaca dem baroya apkapasa wideytafa geja (1993 az 1997 az 1998-1999). Taneafa molikera yo ve dilizeyed wale pakoikeem ke Pascal Lissouba warzaf taneatisik is tel ke Bernard Kolelas keludotagadesik. Azon, va sint vangluyayason, bata toloya lospa va levburesikeem ke Denis Sassou-Nguesso savsaf taneatisik ve doalieyed. Cenhesik va wideytafa geja, Sassou-Nguesso va patcta mefakon al toz tudiliar. Inaf kevelik, Pascal Lissouba sanerotion libuyun taneatisik, va patcta al otcer.
3. Ristulaxoeem
Congoa drewer ton 10 ristulaxo is 76 levristulaxo is 7 widavadota.
Goleem, lentu ge patcta :
4. Sanelia
Sanelia ke Brazzaville Congoa patar va loote Bantu? korikeem is konaka pinotaca dem dana tir Pigme? korikeem (1,4 %). Vanmiae mon tev-sanoya mikra, Kongo? korikeem tir tel lodotaf (51,5 %) aze Teke? korikeem (17,3 %) aze Mboci? korikeem (11,5 %). Ara mikra se va 19,7 % ke kote kaatoed. Sanelia memilton walmunewer kire 70 % ke Congoa vedeyikeem avplekuwed koe geeka ke patcta is biradom is domega ke mialukafo Congo is poke Congo-Welfa vawakelot kagluyas va bat toloy seg. Dere karaket va Brazzaville Congoa tisa vanmiae tela lowidavafa patcta se ke Afrika. Belcon, Brazzaville (990.000 irubasik) rea isu Pointe-Noire (576.000 ir-) va lo 60 % ke sanelia avplekud. Ara widavapa se tid Loubomo (83.000 ir-) is Nkayi (42.000).
4.1 Saneliaforeem
Sanelia koe belc ke tawavo memilton walmunewer. Nelkafa pakava (84 %) moe 30 % ke tawavo koe geeka avplekuwer, baton reduson va skapafa volmilbavapa. Tir amidapaca wale Brazzaville widavaf seg (8.000 ir-/km2) is wedaf witaluaal ke ayikiskafa congoafa tcelda. Mialukaf for (9,2 ir-/km2) zavzar lopinaf dam tel ke Afrika tadava (25,3 ir-/km2).
Congoa va tawadayaf forap se me digir. Yoke zolonuca ke widaveem, tawadayafa sanelia va 684.000 irubasik anton kaatoer, trabe mialukaf for dem 2 ir-/km2. Tel lodekamafo xo se dere geeon tid : talte Brazzaville is koe Niari krant is moe Bembé is Dondo azekexa se is koe patctay poke Pointe-Noire.
Gostragat da ervofa koboda se levgayana gan Congoa bak ironakafa tanda se XX-eafa decemda al steged va jontik geekaf tawadayik da gelbeaneyad ko widava se (Brazzaville is Pointe-Noire nelkon). Tawaday se ke lentekafa Congoa, tel lodacon saneliakiraf ke belc, wori digid va toloyi saneliaki dem logijaf for kapbure vedeyaf mialuk : Koukouya azekexa (lo 35 ir-/km2), gelbe tori yoltafa mikra abdi Tuboniarugal, is geroneka ke Mboci gola.
5. Widavapa se
Wafra dem nelkafa widava se?
6. Skapa
Congoafa skapa moe lapteratawamidura is yanbudind is toln nelkon dayker.
Tuwavaf robeem : toln, inta, demel, singel, derel, radelul, tie, ikz-.
Toln : Va 90 % ke Sokakazawakseem is divburereem kaatoer. Mali 1976 koe Pointe-Noire tukarara zo askir. Daletoe tir tela nelkafa kategiraca.
Inta : Tir zolonafa pakava ke divburereem ke Congoa (sladuaalxa, okumeaalxa, limbaalxa, ikz-).
Ar rob se : se tiexo is moavaxo is digxo is lutxo ikz-.
Nelkaf lapteramidukseem : fekra, bilka, trapamaal, irka, ksago, starpa, ikz-
Kazaf midukseem : botaal is flecaal is fadaal.
Raba : rabama tori raweyaks se (umava, olaxa, oksi, tird, ekot, vukuda, ikz-).
Moltafe levedrenhe : Pointe-Noire molt dere dazanis va vegungaxoeem.
7. Avopa
Lozolonafa ava se ke patcta va bantufa yasa pasud : tid Munukutubava (50,3 %) is Kikongoava (36,5 %) is Lingalava? (13 %) is Mbociava (8,5 %) is Teke aveem (8 %) is konaka ara ava. Lingalava, « ava ke bost » lenteon is roneon kene voa yo zo pulvir; Munukutubava (ok Kitubava), "ava ke vawakelot" geeon zo pulvir.
Jontik pulvisik va Munukutubava ok Kikongoava ok Lingalava wetce toleafa ava va sin dere ud. Bata baroya ava wetce golerava zo torigid, do Francava? tisa tela winugafa. Mali Francugal Munukutubava is Kikongoava al voneweped, vexe Lingalava loon al divlaumar. Luxe Franciava, yoke intafa winuguca tir ava ke roti.
| 
Congoa
