Nok, wida lente kokuksaxo ke Niger is Benue koe istefa Nigeria, va abdiugalafa araya enzolonafa gu vonewera ke afrikafa kudjabalumara al yoltar.

Sedme Franck Willett savsopik is yanbizvopik zo gotorigir wetce abdigade ke lo talteafrikafa balumarafa prostewa. Sedme bat aptacik, dere rotir da kro se ke Nok martig tid koe balumaks yo ke Baga sane (Guinea) ik Senufo? sane (Coteivoira) ik Bembe? sane (Zaira) ik Tcokwe? (Angola is Zaira).

Adaleem is turestasaceem

Nok Araya zo pilkomodar bak 1943 gan Bernard Fagg savsopik ; kan yolt ke telo taneafo kosmayano xo in vaon vexon ve yoltayar. Se kosmayaks fereon askiyin gan dodelik ik dritik kobas koe vopelxo malad va mon tol-sanoyo xo walmunenafo gu talturonon 500 km- lizuxopo. Koe Jos lentrone bata gola, va tcilaxe bravase va lo olkom se divsidayan va vopelkirafo buxaxo yo kawodafu sistu al kolnar.

Tir koafizayana tawoldafa kudjopa : riwe geltralumafa taka se kota nuvelasa pasuyusa va ayikkorafa kudja yo.

Sin ropeson zo tugasitad ; bassumasa dorora, kladanraporkirafa, anton turowinawer lize welma al zo lamer. Konaka sulemafa kudja dere krulded, tulon fuzolkorafa ik jidolkorafa. Tazuk ke bata kudja se vol tir milkafa, wori Nok martig tir. Adala se tid : taniafa tumartigara va lan kolm yo is kaatoerask. Iteem is art zo tumartigad : anamkaf is remruyun etcueem, ik iteem balumayan koe tukevolayan barlent (ke dan wolt omava tir tidefa), ik fenkumuyun kutceem. Kaatoerask mialon tir tuwavakoraf : wale envareva (tulon tela ke bambarafa kudjabalumara) is Ife turietavayana tuwaveva. Tazuk ke taka arapeniwer : koe poz ik fey ik akinta.

Nok martig nuvelar "lodafrikaf" dam tel ke Ife iyekotafa ik trocadayafa taka se. Vexe lana zolonafa nuxasaca yo wale Nok is Ife elimon noved va lokiewafa vangrupera va runda ke Ife koe afrikafa prostewa. Obrasa rindera razdur va pintafa vektasaca yo (zikesikifa otapa dem flek is mardmak, tumartigara va nugeem, dlapera va sorgraca yo), acum lanon tir mexuyavafa. Vexe Ife tuwaveva me tiyir megrupena gan Nok tezasikeem, ise me tiyir kaike inafu stinilu, vexe va sulemaf kaatoeks yo anton zanudayar. Kaiki Ife, Nok adalaf tazuk yo krulded koe beninafa iyekotxa se is milon yorubafa? anoelafa yanba (tulon Gelede xatcasiki yo). Bat turestasaceem ke Nok Araya va inafa nhergafa yorda koo nigeriafu yanbafu trenilu bazer.

Zvak ke evlara

Mecoba co-tir akoyesa ede Nok Araya me tiyir vlevi 22 ok 23 decemda kali yorubaf balumaks yo, is vlevi 15 decemda kali pulukaf Ifeugal (13^-eafa is 14^-eafa decemda). Bibe ke evlara va Nok Araya kle en tir aldafe. Bernard Fagg uldiner da bata araya lanon al vonewer bak toleafa alubdecemda ke taneafa voldecitda ise icle kali toleafa decemda lanon al linver. Bata besugdara dayker moe evlara se kan 14^-eaf bebamilraz ruyena kan sidopaca yo. Lo olkom se al zo trasid koe buxaxo ke nakurugulafa savsafa kuksa yo. Ostik, baroya evlara kan 14^-eaf bebamilraz bazed va 440 is 300 is 280 abdi fird wetce tel lorotis evlaks ke baroya vwa ke Taruga debak lize jontik stogoyeks ke Nok kudja se bak 1960 al zo koafizad.

Koe abdion saveyen buxaf debak se, Nok trocadayxa se tiyid do se warzaraporugalaf olkom (kufta ik niranraporafa genva ik ilbodenraporaf tcekuul), is do conhuta se ke azilraba (puki se ik stogoyeks yo ke yaxayki), is do vopelkirafi zikesiki yo. Kle trakuyut da Nok Araya nelkon tiyir warzaraporugalafa gu gwafa nasbalasa yantanhofara. Walgrupera va toloya rekola me tiyir rotisa kire kuksabuxa se aotced va abdiugalafa conhuta yo.

Taruga joxaxo al betar va bat zolteks. Koe bato kopolexo merelatceyeno gan lavara, mon sanoya cadeka balikeyena ta jera va azilkawot koeon al zo trasid. Vanmiae stogoyekseem meem ke kudja (mon 90 cm ontinafa) al zo rotoltadler. Kwafa tawolda aultover ; tulon tantar se va wizbuyuna ekeda isu furutsa is rilitafi tawoldafi spuntesiki. Koe Taruga mek warzaraporugalaf ugol al zo divsidar. Vaxede aro kopolexo di bilder va dotis warzaraporugalaf ugol, Nok Araya rotorigir divlapuron pasusa va azilugal.

Nok ayikeem va brubeeem ta iara va azilxeka grupeyer ; kare ari bazesiki se lanon tiyir tawamidusikeem. Dum bantuavaf saneeem batugale ve buluyur va pokepaxo (Bauchi azekexa) ta tozuyur va gefa is ronafa viafa lamara. Lanon anton tir sazdafa toltadlera tuke avopafa luzdara se. Vexe tir zoesa da in zo tukotrar : ede lamasik yo dere tiyid Nok ayik se, jontika balumarafa ebeltafrikafa prostewa se co-rotid milxantafa.