Lev Nikolayevitc Tolstoy koe Yasnaya-Polyana (ind ke intafa yasa koe Tula kola) bak 1828 ve kobliyir. Va tel lodontinaf ginaf oluikeem in pasuyur ; koe sayakafa is dobulafa rossiafa izva Tolstoy yolt poron fereon kozwir. Inafe veygadikye al tiyir tcodik ke aboyikeem is dobulik koe Paris poke Napoléon I. Gadikye, fayakik, bak 1814 gan francik se ve zo gralomeyer ; kaiki 1815 ko Rossia dimpiyison, va arpolia ve buluyur aze ton tawadayaf pilkotik deneon ve bliyir.

Koe Kazan kotla Lev Tolstoy ve vayayar. Bak 1851, wetce arpoliazana, ve kiblayar va vertega koe Kavkaz lize va ekava berik ixam kereleyer. Va « Rumeilu » taneaf suterot az "Kazakik se" in bam ve suteyer. Male intaf tawuk koe Krima, va "Sevastopol" bareaf suterot ve reduyur. Moi dili grifliyison, koo Germana is Swiza is Franca ve koyayar aze ko Yasnaya-Polyana ve dimpiyir lize bak abrotcifa bliratena riwe kotvielon di irubayar. Va konak warzot az tel suterotap se ve piskuyur : va "Geja is dili" (tenuyun bak 1872) is "Anna Karenina" (1877) is "Dimblira" (1900).

Wori koe swava ke Tolstoy lidafa is alkafa artowara askiweyer. Prilaks yo do warlaf tawadayik se dum Sutayev is Bondarev va inaf jontik suterot isu teliz ve korietayad. Pu tawadayik yo va intaf taway se in djumanamziliyir, vexe intaf kurenik isu nasbeikeem ve tsuneyed. Va olegana kotcoba in miv riwe iayar, va se vage is vukuda ikz-. Inafa alka ve nuvelayar lidatorafa acum bak 1901 va Tolstoy Tumtafa Ujamaga ve divalkayar. Vexe koo Rossia va galbura va intaf rietoveem ve trenayar ise ton mujik ilkon ve bliyir. Vanmiae inaf galbedus suteroteem zo go murobad : "Jinafa movera" (1879-1882) is "Tokon tir jinafa folixa ?" (1888) is "Giwawera tir koe win" (1894) is "Baroya wadja" (1904) is "Tokcoba tir yanba ?" (1905) ikz-.

Tison balemsandaf, deonepeson, in otcer aze koe impadimak tuakolawer aze ba 07/11/1910 koe Astapovo widama ke istefa Rossia ve awalker.

• Анна Каренина (1877) Anna Karenina
• Война и мир (1872) Geja is dili
• Хаджи-Мурат (1904)
• Детство (1852)
• Отрочество (1854)
• Юность (1855)
• Воскресение
• Исповедь
• Смерть Ивана Ильича (1886)
• Казаки (1863)
• Крейцерова соната (1890)
• Кавказский пленник (1853)
• Севастопольские рассказы (1856)