|
Christine de Pisan (okon Christine de Pizan) tir tana riafa ayikya ke francavaf mialukugalaf suteroteem. Dere tir tela taneafa ayikya askiyisa va suterotgriva ton exava, batdume gan malhopasikeem ke XIX-eafa decemda bokson di zo krupteyer.
Golde inaf suterot se is jontika mivizvafa odiaxaca, inafa perzapafa kruldesuca is suterotafa klepa zo grupenhed.
Xantik mal Pisano, poke Bologna, Christine de Pisan bak 1368 va Franca artpir, lize Tommaso di Benvenuto da Pizzano gadikye, kocadiepileropaf laxasik koe Bologna kotla, wetce selaropik is kocadiepileropik van aboyikeem ke Charles V gazik zo rozer.
Iste gazaboyikeem rumeugalur. Moni 1379 va Etienne Castel gazaf tegivsutesik isu suteptik kurer.
Moi awalkera ke Charles V, volfakafa rekola tozuwer : va kurenik (1389) az gadikye (1390) in drasuyur, acum di zavzayar antaf tolsanalubdaf ta da va yasa dem baroy nasbeik is gadikya is nutikya viunsuyur. Batsugawalkrekolon va tana kotgrupafa wikluba bunher, va wikluba muxasa va inafa kotafa antuca isu olhastewereem.
Kiewegavangiyinon is kojizanon, ta motidara va ugaf is erbaf zvakeem, in gorar da suterotuson toz erbawar. Malion va vayara is sutelara ve blirektuyur.
Koe selt lize ayikya bolkon zo krilayar ise lize ayikyeeem va koti seltafi is arayafi is gaderopafi roti, debalazornara ke bata jotafa nhobrikya, antafa koe volvo, tiyir volfakafa. Soe ta balilikera gelbeson ko vayara potrasir, ise lente keveluca kan gevas suterotaf grabom va tavepera dem takreluca is bagaliuca zilir. Batkane va mafelara is karolara ke milugalikap yo ve rotolgalicuyur : ke Eustache Deschamps is Jean de Gerson. Va erbapomasik se aneyar ise va Bourgogne dacik Jean de Berry gukoer. Inaf nendanik di vanpir ise puon va "Livre des faits et bonnes moeurs du sage roi Charles V" (1404) az pu Orléans dacik va "Livre de preudhommie" (1405-1406) di tarizar.
Iste aboyikeem ke Charles VI is Isabeau ke Bayerna ke danu di vanpir nendanik, inafa kobara va aultoves is gedraf warzeks ravaldus va fiuntanhaca nasbar : va vedaf ik ezlaf alkaf is gaderopaf taveraf suteks yo, va kotcavindaf nhabaf krent se lize va ilkafe detce yo ruer, lize va intaf peztakeem isu mejereem konteraronjon divrozar.
Vanmiae inaf nhabaf ezleem bunheyen wali 1389 is 1405 ("Cent ballades"; "Ballades de divers propos"; "Cent Ballades d'amant et de dame") nelkon zo namid tela ezla se lize tir antiluwats maletis nhobrilusok is ilkaf volkalaceem. Ara se dere tid dlapaf tuke aneyara va pendara va armor is sokuda, tuke inaf fraltaf watseem, tuke inaf lidaf tcilkeem.
Belckapanon va sarefa gaderopafa blira, va wupe yo van patcta golde kevluca ke sersikeem in abdipeztaler ise ta nepalera va sersikeem is koedili "sayudar" : kan "Épître à Isabeau de Bavière" (1405) is "Lamentation sur les maux de la France" (1410). Viele wetce trakuropik gestir, va kot gruperind koilkar, rueson va gaderopafe ("le Livre du corps de policie" 1404-1407) lidam lidafe ("le Livre de Preudhommie" 1405-1406) lidam alkafe ("les Sept Psaumes allégorisés" 1409-1410) detce yo. Va neva icde sayakopa ("le Livre des faits d'armes et de chevalerie" 1410) dere di isker.
Soe, grupeafa pakava ke inaf grabom va rusagamaca me kotviele divvawar, va rusagaca maletisa va bolkarsafa grupelafa aneyara is porsafa griva tori xadolafa grupesuca.
Tela inafa logijafa tanuskaca tir da kan inafa ayikyafa gropa va gorojuna lazava al askir. Tir yoltoe ayikyeem da va aboyaf okoldik se vorcer, ise dum Gerson baton tsuneson va ar "ayikevik" se va "Roman de la Rose" is kleceem ke Jean de Meung lanhar, ise va fraltafa renara kontomon oxon lanhar, ise va dimara va nasbara tisa renarlduca waster.
Sagaf gu mialukugalafa prostewa, inaf suteroteem manton saver va purdafa bonja belckana do jontika tula mal savsugalafa izva. "Le Livre du chemin de longue estude" (1402-1403) kan mon 6000 blok va klokerafa koyara ko patcta ke Proyuca is Ova pwader. "L'Advision de Cristine" (1405) tir purdanega lize va volkalaceem ke ugalafa Franca sutesik divrozar, kenon kostason va undera icde pilkafa volkaluca. Koe "Livre de Mutacion de Fortune" (1403) neva, Christine de Pisan pwader inde bali, askison da in vanpir sutesik, al ikrabetar. Pilkomason va fli va suterotik ise tison oklaf baton vayason, neke meviele drasur da kev volmalhaceem ke ayikyef selt va bagaliuca ke inafa ikra gorojur.
Jontik inaf suteks keskeon zo gobelid dum tel ke suterotik askiyis kan ayikyuca va gorojuna lazava ("l'Épître au dieu d'Amours" 1399; "Épistres du Débat sur le Roman de la Rose" 1401-1402; "le Livre de la Cité des dames" 1404-1405). Bat krent se va ugalafa yoromafa ayikyafimuca vinted. Ede, do Jean de Gerson va "Roman de la Rose" in bokson dilfur, va savsugalaf suterot se, tulon Ars amatoria ke Ovidius, dilfur. Milugalon is jontikviele, inaf suteroteem va ayikyeem ronjon gukoer : koe "l'Épître de la prison de la vie humaine" (1418), yovar da va gejakosugawalkayana gadikya isu kurenikya tolpozilir. Inafa viltera, ta da bagaliuca ke ayikyeem zo krafiar, kali ironokaf suteks ("le Ditié de Jehanne D'Arc" 1429) lize va Jeanne d’Arc yarteson brudir, di exaksawer.
Lecen da in tir tel taneaf tazukoyeyes va kioxafa kevotcera va abdimalhekseem solkatcas va ayikyeem, Christine de Pisan wetce abduef ayikyevik al fereon zo atoer. Inafa suterotafa voda wori me zo govulkur. Battan kali Tolnasbalarugal zo milaskiyir. Lekarolayanon bak kaikif rekoleem, inaf suteroteem bak tena ke XIX-eafa decemda gan malhopasikeem al zo tolkosmar.
Christine de Pisan kali 1418 sutepeyer, viele ko xida buluyur, lanon ko xida ke Poissy ecey lize nasbeikya tir alkikya. Bata bulura va tena ke suterotafa klepa tcalar aze ironokaf tandeem koe bata xida va kobrara ektur.
Vexe, sol bulura lize bak 1418 moi narira va Paris gan Bourgognik se in al gelber, ta bunhera va toloy suteks koswan gan noelot ke Decemdageja ("les Lamentations sur les maux de la guerre civile" (1420) ise "Dictié en l'honneur de la Pucelle", suteyen ta porara va Jeanne d’Arc), milafa ayikyafa intotcuca isu sa di solimpad.
Groteem ke Christine de Pisan askir tanoy aliik ke Dimblirugal ; baton tabexon ve yordayar koe avatazukara ise ve tiyir tel lovaraf kaatoesik va francafa ormura.
|
|
Ara ava se
 Christine de Pisan
 Christine de Pisan
 Christine de Pisan
 Christine de Pisan
 Christine de Pisan
|
