|
Antonio Machado tir tan lokotgrupaf espanaf ezlopik ke XX-eafa decemda, do Federico Garcia Lorca?. Kosaf va francoeva is dere divbliyin, inaf suteroteem va bulapa ke ayabli gronon koerur. Kobrara icde welimeem ke Ayik is Tamava is ke riguca is ugaluca : « Guyuca ik polera ik kivareem ik trobindara is pokolesuca is volkeuca, kotcoba dankana gan ezlopik, tid yona sugda ke ugal is milrekolon yon razduks va tise koe ayajiluca. » In ve vanpiyir negasik va Andalucia is Castilla kan yona larma lize yon titoles wats is rwaltafa koswanuca belckawed.
Bak 7-aksat 1875 koe Sevilla? koe "Las Dueñas" kotgrupafa berma Antonio Machado Ruiz kobliyir. Pasuson va yasa dem nuyevaf is yon abduxoevaf gruadik in tir toleaf nasbeik ke Antonio Machado Alvarez, kotgrupaf rwaltopik vanpiyis witevaf ezlopikap.
Koe Sevilla taneon anhustdon in ugalzeyer. Va baalpeyena setikera di icdeon di suyur. Bak 1883, inafa yasa ko Madrid? inkewer. Intaf rumeugal isu sardugal kle tid madridaf. Gaayanon koe Nuyaf Kizey tori Tavera, ke dan va inafa tazukawesuca eniltiskafa swava en tcalayar, va krenuganhuca is grewapasuca dolge tavesikeem in di videyer. Koe inafi bli bat kizey di tiyir rigotafa yorda, koason va lidaf vodaceem : fenkuwesuca van divef arayeem, is albapara va tuwava, is gustuca va yanba (lexa is zovdara is wenha), is gindesuca, is kobaratarkara, is soyutanhafa blirinda, is fabdurevafa is gugafamafa rietava, is ilmimara va kot puk, is fenkuwesuca van walkalira, is olegara va ageltuca is miltuca wale ayikeem, is seltafa is gaderopafa araya djutuwarzasa va swavaceem ta tukuvara va warzenipa koe Espana?. Koe inaf grabom isu blira bat taveks zo rodimtrasir.
Bak 1893, tison sanperdafo, Antonio va gadikye abdievlon drasur, acum nekev krenuguca is obrapara ke gadikya is ziavikye di zo tcalapar. Va jaftolvultereem is wenha is wenhusikeem dulaper. Ikayolton ko La Caricatura virdama va yon klecaf ok braf teliz, tison antaf ok do Manuel berikye, sanegar.
Bak 1898 va yono sakiafo is suterotafo ulidebaxo nobar ise va yona taneafa ezlaxa suter. Bata tanda jontolon ve tir sugdalasa. Taneon, tir inafa koara va ezlura kan leceva is witeva. Toleon, megrupeson, bata tanda di divatoar va warzafa lidafa is yona listafa voda ; Machado vaon artion di yoter.
Bak 1899 do Manuel koe Paris konakaksaton jonvieler. Tir rekola ke Dreyfus arienta koe gaderopa, is ke leceva koe ezlopa, is ke liteva koe lingeropa, is ke glabafa etrakfamuca koe suterotluzdaropa. Va Oscar Wilde is Jean Moréas in miv gruper. Anatole France bam tiyir tel suterotikap.
Bak 1899, toleafa jonvielera koe Paris. Antonio va Rubén Dario? rungruper. Dimpiyison ko Madrid, do Juan Ramón Jimenez? tunawer aze teni tanda va "Soledades" (Antiaceem) taneafa larma di sanegar. « Batugale, Rubén Dario situndason kevalien gan cavaluzdaropikeem, tiyir diersik ke abictan. Dere jin, mafelayá va sutesik va « Tirbaf Vedeem, va merodolunhen feliik va tazuk is peztaba dan, koe "Dankeem ke Blira is Pokolera" va intafa gloganha pu cin artion ve razduyur. Volse jin, al espú da amidapon di kenolaní. Trakuyú da ezlafa ra me tiyir ravlem yoke mamafa voda ik kseva ik conha ik peztabeem volse tiyir sionapara ke swava : coba va dana gloga plekur, ede va koncoba plekur, kan intafa puda keve tamava tubliweson eruson. »
Bal radimif tandeem, va Helios virda (tana lozolonafa witevafa virda koe Espana, gadena gan Juan Ramó Jimenez) in tiackon dokalir. Bak 1907, va rovava va francava koe Soria Antonio Machado seotar. Inkeweyeson koe yasarekluexe, va Leonor Izquierda Cuevas ba 30/07/1909 kureten rungruper. Va daava is kaliuca ke blira do tel renapanik inafa ezla bam remsuted.
Bak 1911, impavantason va vayarafilav, va Manuel berikye do kurenik dositar. Battel koe Paris va remsuterafli al seotar, ise Antonio koe Franca Reila va tavereem ke Bergson tcoker. Ba 01/08/1911 golde kotcakola Leonor tizon awalker. Kranavselunon ise dimpiyison ko Espana erur ta da zo betuker. « Jinafa takra, van afi is bli, va warzafa galova ke blinasbalarugal dere ker. » Daletoe, kan ezlafa sutera in di ektudar va remsutera va koefa gruyuca ke korik dan va trakopa tanon under. "Campos de Castilla" (Tayeem ke Castilla), is "Nuevas canciones" (Ikaceem), is "Juan de Mairena", is "Abel Martin" ezlaxa is vedaxa malon tid. Antonio Machado ko Baeza widavama koe Andalucia zo koflir. Do gadikya koon inkewer aze perdon di irubar. Va trakopavayara tozur acum arti konaka tanda va vergumvelt ke Madrid kotla di seotar.
Bak 1917, sanegara va taneafa piskura va "Poesías completas" (Kotraf ezleem). « Bellikon, jinaf grabom vodamar, ede vodar ; vexe folí da –batinde grabom bruton vodar- kanon al webé, milugalon dam yonar milsaref ezlopik, va slikafa basgamara koe aal ke espanavafa nhabuca, ise da ronjalbason al kobá ta yon enidaf is loprantaf blinasbalarugal. » Bal idulugal, va worara ke lospa dem yon kotlik ke Granada? (vanmiaeon Federico Garcia Lorca) in kazawar.
Teni 1919, ko Segovia? in zo betuker lize kali 1931 di soker. Va redura va Segovia Sanefa Kotla paker ise wale ebaceem is koyara ko Madrid ugalwalzilir. Koe yon suterotrijay ke Madrid va saref espanaf gruadikeem kazokever ise do Manuel berikye dokobar va sutelara va jontika wenhaxa isu buska isu folvabuska kiewatcon zirsena kali 1931.
Bak 1927, wetce bewik ke Avaf Gazaf Cultim Antonio Machado zo libur. 1928 tir tanda ke taneafa renatwa pu telya dasugdana kan Guiomar yolt koe tweem is ezlaxeem.
Ba 14/04/1931, oltimara va Toleafe Sokasane. Bak 1934-1935, tori El Diario de Madrid fela isu El Sol Antonio Machado gilton dokobar. Bak 1936?, toza ke Wideytafa Geja koe Madrid va in akoyer. Mali doza va lazava ke Sokasane in tupakoar. Bak 8-aksat, Lorca zo adjuber. Machado, wanieno is merovinuno, va ezla pu in ektur.
1937, sanegara va "La Guerra", ixam sanegayana larma dem blok is veda, bata larma yunkeyena gan Jose berikye. Ko kot otuk ke "Hora de España" sokasanefa virda Antonio suter. Bak 7-aksat, va toleafa walvedeyafa aba ke kevfascievaf gruadikeem ta arayarojura tcoker. Bak 1938 ko Barcelona do yasa inkewer. Tozif sokasaneik, Machado denon tir koe pemaxo ke tsunesikeem va Franco ise ko "Hora de España" is dere "Vanguardia" va intafa bruxa ta sanezanira plekur. Teni 12-aksat, vedeyevafa ervolia va Barcelona deblamed ise ton toloyo beratorafo pemaxo va Espana solzarted. "La Tierra de Alvargonzalez y Canciones del Alto Duero" do yon yunkeks ke Jose Machado zo piskud. « Kotviele va tawadayik zolkomé, va kotcoba grupena gan in is afanana gan min trakú ise da battan va jinafe grupene sipir. »
Sol Doña Guiomar va in geja solzarter. Ko Portugala? battelya mallapir, darpe abdulanira ke vedeyevaf milk va Madrid ko Valencia? az Barcelona? luxeon jovler. Golde zieltara va Lorca in me dimaytcur. Fascievikeem abdulanir. Va Barcelona in gobulur, batviele van divexo. Glogawalkeson moo divblirakelda tir, do 80-dafa gadikya is Jose berikye is battelaf kurenik is konak nik. Koe erna, va zolpa dogisa va yona tanuskaca drasur. Lospa tir puskeweyesa. Fentar. Va jowa kal Cerbère sin remlapid. Eldeon ko Collioure artlapid lize koe Quintana gida di jonvieled.
Kotcoba remar volse zavzar, vexe minafa arienta tir da conhukason va keldeem is birakeldeem remat ». Ba 02/02 artpison aze ba 22/02/1939 koeon di awalker. Intafa gadikya arti barka dere. Kagrupeyenon va bagaliafa kotawara in di kazawar. Ko ucom va eluxaki inafe berikye ve trasiyir. Moe bati Machado va ironokaf blok al suteyer : Esto días azules y este sol de la infancia…
|
|
Ara ava
 Antonio Machado
 Antonio Machado
 Antonio Machado
 Antonio Machado
 Antonio Machado
|
