Zegol tir enkotatoraf, kan ilt ik toa ik wikanda ik beza ik moukdunolam va int sinkas. Koe tuwava, kontomon, tan zegoleem va ar (moekote colob) rotcabanher.

Zegol tir tan riaf primates dunol grupias va xeka se ise zanies ta seotara va sinka. Ta gralomera va frunku se, va gamot trasir ise faver, betason va abrotcilu zaleson kare tcalutene fe. Ko frunkuxo va gamot koartigar aze va in dem jontika estutuna beza divartigar.

Zegol blir ton seltafa lospa dem wal 15 is 60 olkik. Lospa va felise zegolye isu zegolya ruldar. Ema ke olkik va klaa is lum vox dere olkaf walzegolaf skedeem rupter. Zegoloc ke dan gadikya tir emakirapafa dere tir emakirapaf. Seltafu grustanilu tir popofu dene zegoleem. Felise zegolye va lospa gader, nelkon va ar zegolye se bal koboda kev se wivgasik ik ar zegoleem.

Ikrafa soltazukara dene zegol tir lepofa dam dene yiwol. Zegolye tir lodontinamafe is logamiamafe dam zegolya. Viele zegolya tir idulikrafa, va kerafa adeesacapa yo moe penayaf jesok atoer. Balon, ba docatena viele fala ta tunasbukara tir tela lodontinafa, felise zegolye vaon vantolongar.