|
Марина Ивановна Цветаева (rossiavon)
Ba 26/09/1892 koe Moskva? Marina Tsvetaeva koblir. Tison jovapaf, dum ara rossiafa ezlopikya se, belison va kevartowarafa ezla yo, va 1905 Artowara? moliker. "Вечерний альбом" (Sielburey) taneaf larm zo sanegar viele in nemon tir sananhustdaf.
Ba 1912 va Sergey Efron kurer do dan va baroy nasbeik di askir, vanmiaeon Irina nasbeikya aelakolon awalketesa bak 1920. Kali Artowara, koe Krima Tsvetaeva is yasa irubad. Efron tiyir gejaf sayakik aze va Batakervolia di kozaniyir. Bam ko Moskva Marina gelber lize volfavlapon alubdon di ugalzer.
Bak 1921 pu in Pasternak vangruper da Efron tir blis is irubas koe Praha?. Tori Marina, tir tozi ke divblirafa abrotcifa sanperda koe Berlin? az Praha az Paris. Do Pasternak va skewesa twadogolera in kiewagitir ise erolaweter viele bak 1923 va blira koe SSSR? kre dam va divblira battel kiblatar. Bak 1920 sanda ezla se ke Marina va sanegprogera kakeved. Va rossiik se remoas va Praha in rungruper : va Nina Berberova is Nabokov is Gorki ikz-. Lente vonewera ke fascievafa iyela, trenar da lhumar suteson va doca dem ezla yo tarizana joke Ceskaslovenska. Bak 1925 inaf suteks yo kev batakaf divlamanikeem va sovietafa vertuma mibud acum in zo stragajar. Teni tanda, copon blison ise va blirugaceem trumamason volse golde volfakafa blira koe Ceskaslovenska puskeweyeson, ko Paris mallapir, koe Praxa va kurenik iskeson. En tir robiskapaf. Ile intaf blif kliteem ("koe Rossia tí neviskaf ezlopik volse batlize tí belisikiskaf ezlopik") soe trenar da blir ise suter milkalion dam kontegeem is milarmoron dam poeem askalbas gan in va logripokolena lazava yo.
Bak 1926, kan Pasternak, va "Duineser Elegien" is "Sonette an Orpheus" ke Rainer Maria Rilke? kazawar. Barafa twadogolera koblir lize va artel kottel mafelar. Rilke tijir kotcakolaf koe Swiza abicon abdi awalkera. Pasternak gan sovietafa vertuma zo belkur. Rilke, dan dene bat tuantan is grupensen ezlopik va tana sarefa taneafa puda al grusoltrakuyur, pu in ve suteyer va "tokkane va sint uzat ? Wiltvordon", bak bata trelafa is cuisafa dogolera.
Koe kerafa Rossia?, va batakervolia Marina siskeyer ; koe divlamanikeemxo va Mayakovski? kevrojur. Bak 1928 brudison va inafo ezlapo va divlamanikeem ripindar. Milon ede bak divblirugal suteper, golde intafa kotirkara zo sanegansar acum gojer : "batlize [koe Paris] tí mefavlaf, banlize [koe Rossia] tí volrotis". Do sovietaf birgardial kurenik kobar ise va bilma se kunte kevstalinevaf lhumasik se paker, va coba Marina nuvelason afanayar. Bak 1937 ko Rossia nasbeikya ve dimlapiyir. Azon di tiyir Efron baton divvawas va francaf ardial.
Bak 1939, me rozavzason, ko SSSR Marina is nasbeikye silukon dimlapid. Volkaluca va in koon ker : kurenik di zo zieltar ise nasbeikya di zo rezgaler. Tison gripokolewes is jovlen gan kottel, in suter : "Pu redusik : adim tir gemelt / da va fizud dimzilí. / [...] pu rinafa volpeztorafa tamava / Va vewara anton kalí". Marina Tsvetaeva, dum ta da va ironakafa vewara tcalar, ba 31/08/1941 va int rumkar. Anton tir 49-daf. Bak geja nasbeikye di xonukar ise tir tuke Ariadna divpemaxoayana nasbeikya da va inaf grabom grupet.
Inafi bali tir lugavafi. Folvaf wats yo vlupes va grabom ke Tsvetaeva gan tizafa griva tori blira is kramuca is vedeyaf zaeeem, is tori vewara va rapaluca is soaks yo is skintaceem zo felid. Koe "Tir jin levconhas", Nina Berberova, dana va inafa ezlopa mafelayar, va in baton atoer : "Va guazafa titolesa zoera va yordagandura in al xaakar ; ikikon tiyir rotapstan is mevangrupen ezlopik ik gadikya ik kurenik ik fertik ke jotalistikye, aliabdiugalkirik ik dankasik ke otcesa ervolia ik jotaf godevrik ik skewesa nikya. […] Vexe me kiewaskiyir va felira va int iku nhofara iku grupera. Va mana grupejera va int milon arayayar. Tiyir korowupen ik mivokajaf ik volkalaf acum iste yasafa « begama » zavzayar antiaf. Trenon vecaweyer ise coeweyer".
Pegon aneyason va kakeveks yo is kagrupesuca, keskeon (va Sofia Parnok is Rodezvitc) in divekureron skedayar ise va napaca yo (do Sonia Holliday jotaf wenhusik is Staxovitc elpatusik is Andrey Volkonski guazaf sersik is Nikolay Gronski). "Va jin kalterktac ! Ware zo gonalbá kire awalketé". Olegara va bellike viwazena gan tueaftasa albolegara. In, kotviele gripokolen, kotviele bakan, kotviele volkalaf… Va blira inafu lugavuca weyonar. Iyeptasa skewera se, twalbara yo, tori Tsvetaeva alba tir kevaldo ke redura. Volruptesi is iyeptafi is bellikevafi rali va in vol spinkayar ta stuvablira koe doeva koe SSSR ik tira do kevdoevaf lhumasikeem, acum sol saref suterotxoeem uduton ve zo divpakudeyer. Dolge avot, tila ke Tsvetaeva tir milafa : jonte blifa isu ageltucafa, peztalenhera va altafa geltruca ke ravlem is sugdaleem. "Slike kotviele al tir sabe ke jinafo koexo", in kaliyir.
Blira dem se skewera is sollipawera is naca. Blira tanion kaikvolana koe inaf ezleem. Ezlopa dum folvabali. Volbografa is pirafa is basalmapana anda dana gan in assuter ta moblira kaiki kote yasafe ik peztakafe ik ugafe egale. "Joanuca is mejenianuca ke inaf blok se kevie milbava is cwa ke tel yo ke Puckin kontomon zo osted. Va tazukuca ik glabuca in trumamar. Gonier. Awalkera is sutera va sint en gluyad. Ede ezlopa tir blira, tir wetaradro ise kobarazega tir muxelk. Godilfusa is gonempasa is gotrovgasa wetara va rolona koe ava. Wetara va tana intafa pakava ke dana basalmaks is gribidga anton lapted. Ta da me zo rotroker, va intaf tey in godivbulur. Sutera ok awalkera, tir antafa okaca".
|
|
Ara ava se
 Marina Tsvetaeva
 Marina Tsvetaeva
 Marina Tsvetaeva
 Marina Tsvetaeva
 Marina Tsvetaeva
 Marina Tsvetaeva
|
