Viele jin tiyí tevdaf, konviele, va cuisafa ewava al wí, koe neva icde Govitafo Aalxo dem « Blidanafa rupa se » vergumvelt. Batcoba va tsayperake fixase va snavol kaatoeyer. Batse ksudaks ke zovdaks.

Koe neva zo kaliyir : « Tsayperake va kotafa wivga me roxanhason sofixar. Azon mea gruzekar nume tandamialon logason keniber ».

Jin va stuveem koe wuka bam undepeyé nume kan ksevogalt silukon kiewaskiyí da va taneafa zovdara conhuká. Jinaf zovdaks dem 1^-eaf otuk. In tiyir bat :

Pu milgik yo va grot bam nediyí ise eruyú ede zovdaks va sin tuvudesayar.

Pu jin dulzeyed : « Tokdume edji co-tuvudesar ? »

Jinaf zovdaks va edji me kaatoeyer. Voxe va tsayperake fixase va fuzol. Jin va koee ke tsayperake bam zovdayá, ta da milgik gruvangruper. Kotviele va pebura sokolegar. Jinaf zovdaks dem 2^-eaf otuk tiyir bat :

Milgikeem va jin pirdayar da va zovdara va fenkunafe ok budenafe tsayperake vulkú ise da va tawavopa ik izva ik patavara ik pulviropa kre dlapé. Batinde jin, tison perdaf, va cuisafa klepa va lingesik jovleyé. Golde rodjera ke taneaf az toleaf zovdaks zo tuburdayá. Milgik va koncoba meviele miv sovangruper, nume wetce rumeik pufa kotvielefa pebura cuur.

Va ara exava gokiblayá nume va severostedara al ravé. Koo tamava kotlizo al talá. Nume tawavopa, tageltafa, va jin al zanipiyir. Jin va Sinia sol Arizona taneitason grusolwiyí. Favlapafa ede mielon tí eglunaf.

Batinde, blison, va jontik ekemik uzerapayá. Dene milgik yo al blipí. Va sin pokupon wiyí. Batcoba va jinaf vil tulokiewansayar.

Viele va tan nuvelas gwidamaf kakeveyé, va ware videyen taneaf zovdaks varzeon bagalayá. Djugrupeyé ede in tiyir vangrupenhes. Vexe kotviele pu jin dulzeyer : « Tir edji ». Bam icde tsayperake ik govitafo aalxo ik bitej pu in me pulviyí. Vwon gu in titayá. Icde gomuy ik elkaduti ik gaderopa ik bagalt pulviyí. Nume milgik grupeson va lidovakirik tiyir valeanhaf.