|
Firdausi Tusi ( فردوسی طوسی Persavon)
Firdausi, tir kan bat yolt ke dan xanta tir melanafa da Abul Kasim Mansur ibn Axmed ibn Faxr ed-Din tanoy persavaf ezlopik gilton zo yoltar. Moni 940 koe Cadab widel poke Tus koe Xorasan winka Firdausi ve kobliyir aze delapon zo ve gaayar ; va persava is mafelon digina arabava is paxlaviava belcon ve vayayar. Icde inaf jotiluf is milon oyaf tandeem va abiccoba grupet ; anton da va keafa vayara ta grupera va savsafa persafa izva in askiyir ise da tiyir pegaf gu icdefi cenkasiki se rotrasini koe paxlavifa ugalda se, pilkovon koe Danicver Dixan dotay.
Lanamon, va tugeltratan abdumimaks va ezlasutera va izva ke Persa? in ixam kobrayar, vexe va in Dakiki? icdeon abdiayar. Yoke folvafa awalkera ke battan bak 980 in davon ve kokobayar, faveson va fosaks ke tel abdiasik beka konakviele vaon mekuvon karolayar. Tiyir rekolanha ta siskera va sega yo ke iranaf gradilik se. Bardecemdon belkuyunon gan arabaf seltay, va gaderopafu is suterotafu volruptesilu persaf vedey boreon fu dimtrasiyir. Korik se koteyaweyed kan nega yo va savsaf persikeem ; tiyid kalaf dimtrasison va man olukaceem, ise va po ke vedeyeva satolenu aklilu tulobliyir. Acum taneaf blok se ke Firdausi boreon remotalayad.
Bata poraca me stapeyer pu erbakiramaf ezlik ; va erbalevgisik in olegayar. Va tan taneon ve trasiyir : va Abu Mansur bowesik va Tus winka, vexe inafa ezla men tenuweyer viele Abu Mansur ve awalkeyer. Bam tison 58-daf Firdausi ve kaaneyayar va dendara ke tugazaweyes Xazni Maxmud?. Ko Xazni kle ve lakiyir lize, golde lijkilu ke gazezlasikeem guyawes yoke licrakef kevlik, in ve flecupuyur da zo kodlapayar. Wori va progesilu ke sersik al kiewaskiyir ise tison porakirapaf is kulapaf va grabomeem diliodon co-gotenuyur viele va fol ke Maxmud aboyafa skujera se kevon ve ripindayad. Tison aundapaf is zidapaf ise kabuyuson mo sultanik va udutafa kleca va Xazni in ve buluyur aze, ta da va kaaneyareem kruleyer, widavawidavon ve lutceyer.
Milon koe Bagdad? El Kadir Billax xalifik, tori dan va "Yusuf is Zuleixa" ve ezlayar, va dendara kev zidilu ke Maxmud me ve ebleyer, acum ko Tus ixam guazanhafi Firdausi ve dimlakiyir lize bak 1020 moion ve awalkeyer. Zo negar da adim Maxmud sultanik, raveyeson va skujera se tukosayasa va ezlopik, al eruyur da vanmia aboyikeem in di dimpiyir ise va yal dem 400 000 moavatalolk puon al stakseyer. Ba da va tan tuvel ke Tus kamba zilisa va yal koolapiyir, ta da ko awalkikxo zo stayar va ar tuvel alto ke Firdausi divolapiyir. Naskeikya ke ezlik vewayasa va stakseks pu gadikye, ta vegedura va oblasiki djukolnayani gan Firdausi erba zo ve uneyer.
Aldaf suteks ke Firdausi zo yoltayar kan Cax-Namex (Neva ke Gazikeem) ; tir ugalafa nega va bifeem ke Persa bak 3600 tanda kali 636-eafa ilana, trabe evla ke islamafa olgalicura. Vaxe Cax-Namex, ke Firdausi anton zavzar "Yusuf is Zuleixa" ezla ; tir kridjoveks gan Alkuran neva? va regala se icde skeda ke Yosif do kurenikya ke Putifar.
|
|
Ara ava se
 Firdausi
 Firdausi
 Firdausi
 Firdausi
 Firdausi
 Firdausi
 Firdausi
|
