|
Tumbuktu (uldinen 32 463 ir- ba 2005) tir san-pereafa widava ke Malia is widot ke milyoltafa Region Tumbuktu? gola.
| Widava | Sanelia (1987) | Sanelia (1998) | Sanelia (2005) |
| Tumbuktu | 31 962 | 31 973 | 32 463 |
| Otulara : 1987, 1998 ; uldinera : 2005 |
Tumbuktu (sonxayavon Tumbuktu = betsava). Widava ke Malia lente lodavapa ke Niger kuksa. In tir arte 10 km lente kuksa koe bixefa azeka lize tid jontika tourka isu brezodamna isu piaal. Sanelia va 40000 irubasik mon ruldar. Izvafa abdieuropafa pakava ke Tumbuktu tir barlentkorafa is welmapafa ; rawaks se lenteon is talteon anamead vrulutas va logijafe lekefe divatce ; tela masdjidapa tir poke lenteuulxo ; bak 1826 inafe anambe gan peulik se al zo vilar ; teni XIX-eafa decemda widaki is toloy folk gan francik yo lenteon al zo vegedud. Nuda se tid mantafa, mona se fereon tid vegemkirafa is glupanhafa is vegeduyuna kan awaltturodayana anamkafa norka se.
Savsafu Tumbuktu va tevoya revava ruldar : va geeon Sanegungu tela losaneliakirafa do toloyo dolexo is Sidi-Yaxia masdjida, is va isteon Sararaika lize Yukubaina ceixik lekeon sokeyer is lize berm ke sonxay gazikeem tiyir, is va talteon Bagindi kontomon vamolavana omafa revava, is va Sankore vane lenteuulxo tela sonray revava do tela alubtamakkirafa masdjidapa, is va getalteon Sangereber do santantamakkirafa masdjida. Molt tir koe Kabara kene lentedomega ke Niger kuksa.
Anton rade bak muvugal ugale ko Niger kuksa va widava rionda se kagluyad, va ara lava dam tela ke ujiweem is lavakeem Tumbuktu me digir. Lekeon mal Djenné ik Macina va intaf bloteem is mal Kabara va inta Tumbuktu malsaveyer. Nelkon tiyir kazawidava tukulana kan remdolekareem wal Sudana is termtajoya se remoasa va Saxara? vane Magriba ik Insalax (Tuat is Jazaira) is Xadamus ; pu Sudanikeem va eip ke Taudeni kawoda se is lentaf is xorabaf warzeks yo is moavaroga se is leltxa yo ; va folida ik arida ik brixa yo ik lay se ke Kano ik wula ikz-. Bata kazara ixam al tulodomawepeyer ba francafa kerelera. Moni 1895 va 6000 ir- deblitafa sanelia jontolawesa ba dolexoviel se ware anton ruldayar ; va se sonxayik (jontik moekote koe Kabara) is kuntaxik is Ruma tolzaavik is peulik is tuaregik is magribik is parloesik ke kotafa Lenteafrika ruldayar. Va Bekaya staba lizukafa gaderopafa turestuca nelkon pasuyur. Tuke kruldesuca ke madrasa yo is nevaxe se islamafa araya koeon tiyir zackafa.
Nuvelar da moni 1077 gan tuaregik se Tumbuktu widava al zo redur ; olgalicura va Walata bak 1325 gan Mandingik se, ko Tumbuktu va istefo dolexo ke gola ve arbureyer. Ton zolonaf aveg ke islamafa araya gan Malia Gongo-Musa ginik widava zo ve artazukayar. Porfeon ve tiyir tan av ke Sonxay toleafo gazaxo. Ba 1591 gan magribikeem zo ve olgalicuyur, aze inaf andalusaf zeltkirik yo stan gan Djuder ve titickaweyed ise ve tiyid va xante ke Ruma tolzaavafa sanelia dana bak XVII-eafa decemda ve tuvolrupteweyer.
Kramon, bat olgalicusikeem stayan ko Sudana gan Djuder is taneaf radimiasikeem (pacik se ke Tumbuktu) va stuvikeem moekote ruldayar. Inafi aroti isu volugda isu dubiereem isu warkuca isu gruspesuca isu brazareem va islamikeem is grupelikeem isu volgrustasuca vaon nelkon ve murobayad. Kev sudanaf seltay va tanoya lodawalkedaca inafa walpira ve lazavayar. Folison va grupelik se ke Tumbuktu, vertuma ke pacikeem, ede loon al jijayar, va enrawara va coba volfakon vegeduyuna gan Manding ginikeem is konak Sonxay? askiaik ke Gao co-stayar.
Mali 1660 vertuma ware anton erniguyur koe Tumbuktu ware golevgayas va rinta se bak 120 tanda. Remi rekola mali 1660 kali 1750 va 128 vanmiae bat espuwes pacikeem "Tedzkiret en-nisian" neva dribur : va vertuma mana ota uiveon adalar. Mali monion 1660, kot kalstegesikam se dan en tiyid pirtaf da yoltoe sin koe masdjida se sanefa blikera zo kaliyir, va rictulamuca anton videyed ede pu Ségou Bambara gazik mwaskis koe geeka culiekayar oke pu Ulmidan tuaregikeem mwaskis koe lenteka is fereon kerstias va Tumbuktu va gamiafi webesiki se dodeyed. Mali 1780, Paca vergumvelt en ve griawiskiyir, acum koe Tumbuktu anton ve zavzayar tan vodasi kadi kiblani vanmia Armik gan ont Arma sane ont Bambara? sane ont Macina Peul sane kare felisuca ke ugal.
Geltron, tori widava bata rekola ve tiyir tana ke trenafa musuca is copapuca. Bak XIX-eafa decemda, Tuaregikeem taneon ve mupeyer ; azon Tumbuktu zo ve keviduyur wale in is Peulikeem ; wali 1826 is 1846 va widava in ve kereleyer ; dotrakura ve walpiyir, pokaykasa va peulafi kadi is sonxayafi kadi, is jovlesi pu Bekay ceixik va dotafe bowere. Va widava El Xadj Omar ve koilkayar vexe ve zertuyur lhumason va Bekkaya sane. Wale Tuaregikeem is Peulikeem koboda ve trenayar. Bak 01/1894, francik se stan gan Joffre va Tumbuktu ve kereleyed. Va abdifa zolonuca widava mea ve dimtrasiyir. Ba volruptesuca ke Malia, bak 09/1960, wetce kelu ke warzafa soka Bamako zo ve abdualbayar.
Bulafa gijayoltuca ke tel kazaf widap ke taltefa Sudana al askiyir va ajegot ke jontik taltekaf koyasik se. Bak 1826 Laing koon ve artlapiyir vexe zo ve adjubeyer ; bak 04/1828 Caillié sanbalemkon ve ugalzeyer aze va pimtaks ve askiyir ; Barth tenganon gan Bekkaya sane bak 1853 tevaksaton koeon ve bliyir ; bak 1879 Lenz koon ve piyir.
|
|
