Batvielon, Tanzaniaxo tir telo xo videyeso va lokulaf is losavsaf conhuteem ke taneaf ayikkoraf tisik is ayikdunol. Bak 1959, moe Olduvay ecorxo debak kosmara va zavzaks ke Zinjanthropus (1.750.000^–daf autralopithecus) gan Leakey se, ve noveyer da afrikaf abdiugal is ayizva warzon zo koafiyid. Kuritcafa is warnafa bada yo ke serixo va tisuca ke losavsaf ayikdunol (Homo habilis) azon (1963) ve razduyud. Adim, koe lotitefa bada, va 600.000^-daf zavzaks yo ke Homo erectus ve divsidayad. Strabrega se ke ilbodeyena xeka isu dri trasiyina koe lonoeltafa bada va elubkuca ke ayexonenuca koe bata gola ke Roneafrika vrutad.

Azaf greelteem ke frofara, moekote icde tel taneaf nesideem ke towara ke ayik radimi turowinawera, soe zavzar tapedaf. Neke, radimi ruyera kan riwe milugalaf kosmaks yo koe Kenia, nuvelar da Roneafrika geltron tiyir irubanafa mali Savsaf Raporugal gu ayik yo vanyasas va noelafa batakafa sanelia vox dere lospa se vanyasasa va Pigmeik is Boshiman (tulon Hadzapi) is dere Hottentot (tulon Sandawe). Azon kolamara ke bantufa mikra se ve dilizeyer, tel lo Tanzaniik se veyon tid. Adim, remi tela ironokafa decemda se, nilxof grelt yo (nelkon Masai), rigoton vartes, lan sinaf va tawamidura ektudad, do bantuf va sint zaavabelckayad ise ko lentexo inkeweyed.

Ken krimt, antafa pakava ke Tanzania fakon rovansana gan divutadavaf gedraf lamararust yo, abdi fird gedraf zixeem ke frofara evlawer : Azania kudaf krimt gan Ptolemaos tawavopik bak 150 ve zo pimtayar. Azon, arabaf dolekik yo isu totasik se va bata gola koingapayad : zabdura va lizukafo gazaxo se, aze moni XVII^-eafa decemda ko Dar es-Salaam is moekote Zanzibar, kapbure levetirikbutcara, redura va gijarotifa sultanikeba se. Ko bata patcta Arabik yo va jontika ra ke intaf seltay vanbureyed ise va aveem turestapayad : warzafe gluyaracave vaon di maletiyir, swaxiliava noelon una koe Zanzibar is dere kotafo tanzaniaxo (in tir tana toloya winugava) is Kenia is konaka koefa gola ke tadava. Radimi Arabik se, di tiyid Indiik yo (malipon porgon skedas do biradom ke Lentronefa Afrika) oras va krimt ke Tanganyika ; tozuron kselduyun gan Portugalik se, ta kobara koe kazamiduxo az vegedura va kolus kelot az adim pakera va boniarafa arpolita gan Englik yo azon di zo uneyed. Tenion va kazaf tegiraceem tukuvan gan boniara di ektudayad lize va antokanha pu int di ravalduyud.

Europafa kolamara titir lezolonapafa ko Tanzania dam Kenia. Bak 1885 ve bokayar, vani dotrakura wale Engla? is Germana? ta da Tanganikya vanpir germanafo boniaxo. Ba artlapira ke Europik se, viele kevura ke Arabik yo is lizukafa sanelia se al tulegijayar, batakafa kolamara di vanpiyir lonoalafa ise gu avplekura va lentexof bodaxoeem den germanik se, sumpayan gan aultovesuca ke wula is duz is moava is tciaminta, nelkon exaksaweyer.

Ede tela lo tanzaniafa sanelia tir vey bantuxantafa, jontik grelt krulded tison kontomon amidapaf kare gedrafa abduaxa se va tumilawera ke nilxofa ik xamitafa lospa yo. Bantufa mikra se lodote tid Sukuma (lo 4 celemoy korik) exonenafa kene geefa kadoma ke Victoria uzda is koe Serengeti azekexaki, is Nyamwesi (1.000.000) moe istefo titexo, is Makonde koe geefa winka se, is Haya is Yao is Gogo ronkoe titexo, is Chaga wale Kilimanjaro is Meru, is Zaramo xantafo ke Dar es-Salaam gola, is Bena lentrone Malawi uzda (bata mikra tisa zuluxantafa dum Angoni). Ar greltam se (Tanga is Kutu is Mwera) tid exonenaf kene krimt. Lanafa lospa se (tulon Sansawe is Iraku is Wanbugu) tid melanon xantaf voxe nuvelad da kan lana arayafa kerdela se (tulon zanolasa ava yo) va Boshiman zae ok kan ara kerdela se va Xamit xanteka vanyasad.

Nilxof mikraf belc gan Masai se riwe divlapuson kan vartera blis nelkon zo kaatoer. Abrotcion kivayanon gan bantuxantafa deblitafa is tawamidurafa sanelia se, sin div intafi tawavokipi gan Europik se ve zo aloyayad nume van seg (kan Masai rijust yoltatan) poke jowa do Kenia di zo malplatiyid. Numon va pakava ke mikrafa dokotuca is arayafa gadakiewega ve drasuyud ise do ara patctafa mikra se va sint kontomon belckaweyed.

Fuxe 12.313.469 irubasik otulayan bak 1967, 11.481.595 tiyid afrikaf. Ota ke Arabik yo gu 29.775 bam zo gunsteyer (sin va patcta jontikote al buluyud ise bak kevmadara koe Zanzibar bak 1964 arote al xonukayad). Asiik yo, kiewaskiyis da va tela logijafa pakava ke skapaf is kazaf tegiraceem stujeyed, rusagon va danekseem va tuafrikasa gaderopa bokayana bak volruptesuca di levgayad : bak 1967 ware anton tiyid 75.015. Milevlon koe patcta 16.884 Europik ware bliyid. Adim, mon 400.000 gelbesik div vegungaxo se (tulon Burundia is Rwanda) noelon tid.

Taneafa saneliafa vonewera se ke Tanzania rotapon zo gruped. Soe levaykat da kastawepera ke sanelia va kotaf levetirikevugal lanon al adalar. Taneaf gofolin gunsteks yo bazed da 5 celemoy irubasik bak 1935 va patcta al co-kereleyed. Male 7,4 celemoy bak 1948, bata voda bak 1958 va 9,4 celemoy co-zomeyer. Bak 1967, tela taneafa otulanhara va 12.313.469 ziliyir. Bak 1978 : 17.512.611 ; aze bak 1987 : mon 23 celemoy ; aze bak 2002 : 34.569.232.

Bliragropeem ke saneliakipi ware tir xokagapaf, nume gotugeltrana galucindafa abduxoa zavzar torigirafa. Batcoba lanon pebur da latrarabuok ke sanelia (tandon gunsteyen gu 3,4% wali 1975 is 1980) zo rokrupter da tir bruton axaf oye nasbalarabuokap (loon 37 ‰) ke Tanzania, kore bellike tir zolonafe.

Tanzania tir, radime Soomaalia, tela lesaneliakirafa patcta koe Roneafrika : dem 36,6 ir-/km², saneliafor tir riwe milaf dam tel tadavaf vox ledomapaf dam tel burundiaf isu rwandaf isu ugandaf. Noelafa Tanzania abrotcion tiyir opelaf seg ta remlanira van tawavo lodabdafo is lozeitafo gu midura is vartera lodam gola ta tudeblitawera. Tela toloya radeaca tid Zanzibar (375 ir-/km²) nelkafa ewala isu Pemba (368 ir-/km²). Koe zavzaks ke patcta, rade Dar es-Salaam widavarea, lize lamararustap mal tel lowawaf goleem noelon ware zo disver, lo 80 ir-/km² voda kene Victoria uzda (koe tawamiduraxo aname Mwanza) is aname Kilimanjaro mevta isu Meru anton zo roverter. Isteon, kapbure laviskuca ke siday, kale 10 ir-/km² koe koefo rijustxo isu mellaxo, for baxakon tulegijar.

Kevbara va tawadayafa divbulupura tir medrikafa. Bata batvielon aliesa va patcta, kimason va vonera va tawamidurafa warzera, golde rodjera ke ujamaa gaderopa pakavon zo dirbur. Sanelia, lozalenafa gu tcastafa irubara is egajayana ta warzafe bliracave, gan bata gaderopa al zo stegeyer da ko mon 8000 dodafa wida lospaweyer.

Wida, exonenafa iste miduxo ok vartexo is nendaranukukirafa, tir logiltaf tazuk ke prostewafo tawadayirubaxo. Belcdre gan seltafa grustanuca is skapafa tegiruca ke grelt zo kagluyar. Dofe anambe poke irubaxeeem va yosara va bonoleem tel lofereon nover. Jadion ivamukoraf kiray dem feykorafa kepaita, kan lizukon aultovesa bagugota al zo vegeduyur. Inta is bapla is tawa tori rebaveem ke tela antafa olkoba. Kot kiray va yasoglukam bravar. Jonkurerafa yasa, dem jontik yasoc, koe maweem ke loglupaca dem konak kiray walmunewer.

Xadolaki se