Tel nelkaf sverigaf suterotik ke miala ke XX-eafa decemda. Pär Lagerkvist va se ezla is wenhaxa is warzot is rupa is muxarapokirapaf suterot al warzer ise intafa turestasilu wali 20 is 70 sanda tiyir zolonapafu. Ba 1951 va Nobel Suterotafo Poradro kazawayar. Dive inafa kobara is grabom icde pilkik va abiccoba grupet.
Tuwava ke kiewe is rote is aneyara va alkafa folira tid wats yo felis va inaf grabom.
Nasbeik ke vawakelotaf dodelik, Pär Fabian Lagerkvist bak 1891 koe Småland sverigafa? geefa winka koblir, tel lojotaf ke peroy berik. Varteyen koe aludevon is prostewon alkafa yasa, Lagerkvist waveon gorayar da di djuvanpiyir suterotik. Tison bemik, ko lizukafa fela va ezla yo toz sanegayar.
Lagerkvist bak 1911/1912 koe Uppsala? kotla va yanbizva vayayar ise bak 1912 va "Människor" (Korikeem) taneafa neva sanegayar. Bak radimifa tanda, worayason va Paris, va "Ordkonst och bildkonst" (Suterotyanba is Lingerayanba) sanegayar lize va "ilblisa" sarefa suterotyanba dilfuyur nume wetce teza ta vonera va witaf suterotaf martig va Lageva? is Muxareva? drageyer.
Remi Taneafa Tamavageja koe Danmarka? irubayar lize va "Ångest" (Pola, ezla yo, 1916) suteyer ise va wenha toz vayayar. Intaf "Teater" (Wenha) suterot bak 1918 karaker da Tuwaveva tutulayana gan Ibsen? tiyir volurmafa gu witafa teza yo. Wetce teza, Lagerkvist va lonoeltafa muxarevafa wenhaxa se ke August Strindberg? ikaon abduaskiyir.
Radimi worara ko Italia? bak 1919, Lagerkvist va "Det eviga leendet" (Kotabafa levkipera, 1920) suteyer, va tana lokotgrupafa rupa. "Gäst hos verkligheten" (Kozidenik ke Geltrilu), trelaf warzot omavanaf gu rumeugal ke Lagerkvist koe Växjö awiyir bak 1925. Kaiki konaka tanda ke divexofa blira, Lagerkvist ko Sveriga? dimlapiyir ise pok Stockholm? inkeweyer. "Bödeln" (Tiglik, 1933; wenhaxa, 1934) warzot nedir va inafa latrasa bibera icde kotilueva dana bal sanda abdi Toleafa Tamavageja va Europa toz vlevplawayar.
Bak 1940, Pär Lagerkvist ko Swedish Academy zo libuyur. Bak 1944 "Dvärgen" (Klodik) warzot, reiz icde ortlik, pu in va walvedeyafa kotgrupaca burer. "Barabbas" (reiz, 1950) loon tiyir lokiewatcaf.
Bak 1951 Nobel Suterotafo Poradro va Pär Lagerkvist gabler : "ta yanbafu godjilu is volruptenhesilu ke swava kane ezlon lwir da va dulzera icde kotabafa bibera ralentasa va ayikeem trasir". Tison tevsandaf is tamavavartaf, in va "Aftonland" (Sielxo, 1953) ironokaf ezlak warzer, aze va warzot intaf abdualban muxaratazuk dimpir. "Sybillan", taneaf warzot ke alkawatsaf enk bak 1956 awir. Azon "Ahasverus död" (Awalkera ke Ahasverus, 1960) az "Pilgrim på havet" (Befoltik ko bira, 1962) az "Det heliga landet" (Tumtafa patcta, 1964). Inaf ironokaf warzot isu neva, "Mariamne" zvakafa renarupa bak 1967 zo sanegayar.
Pär Lagerkvist koe Stockholm bak 1974 awalker.
|
|
Ara ava se
Pär Lagerkvist
Pär Lagerkvist
Pär Lagerkvist
Pär Lagerkvist
Pär Lagerkvist
Pär Lagerkvist
|