Ba 13/04/1922 koe Butiama Julius Kambarage Nyerere. Va taveradob koe Makerere kotla seotar aze koe Edinburgh va yanba kiewatcon vayar. Ektudason va gaderopa valev tavesikeba, bak 1954 va Tanganyika African National Union redur ise va tazukara va vedeyafa jilaca koe intafa patca paker. Us katalikevik, va tawuk ta volruptesuca jupar ise, vewason va iskedara va europafa is asiafa ponesaca yo ke Tanganyika, va gindesa vedeyeva waster. Ikatcuson va "Uhururu na Kazi" (Nuyuca is Kobara) adja ise levgason va talpey tis moe nelkoteem ke opafa selteva, di gruper da va gijotapaca anamon lospar bak libura ba 1958 az 1960, nume batcoba di nover da in kal koefa mivvexuca az volruptesuca bak 1961 va patcta jupar. Ba 09/12/1962 sokasane zo etimar ise Julius Nyerere vanpir taneaf taneagadesik. Bak 1964 va tanara va Tanganyika do Zanzibar tugeltrar, baton nasbason va Tanzania sokasane.

Nyerere tir pilkovik vanmiae targaf afrikaf okilikeem. Pakawes wal dinereem ke geltruca is nelkoteem ke ujamaa (rojuyuna koe Arusha talpeydewitca ba 05/02/967), tel tanzaniaf gadesik meviele ebkayar, enlikeson va tel lodesaf zvak yo ise pendeson do sanelia (yoltanon kan "mwalimu" / tavesik swaxiliavon) va belcelafa folskeda se. Batcoba noveyer da va jontik zvak is kevkaliks is axoda motidayar. Gadera va vonensenafa patcta sedme rictulokaf bolk, voxe trumason va ravaldura va saneroti kare seltevaf talpey goredus va gotuvedeyan warzeramergileem xuton gu divedirot vox volruptesuca, ise vewason va kota conhanuca, tiyir voldrikaca.

Dekson tiuson, Nyerere kiewaskiyir da divdjigayar. Grupeyer kane va zvak tantanon suler nume maer : va vonera va blotmidura ta dulzara va sanelialatrara, is va tulopoara va rabafe levedrense, is va lhumara va roduca, is va tuvodara va levesidaf robeem, ikz-. Moekote vangrupeyer da patcafa kiewaskira va tawadaytamava adron remayar.

Ede redura va tawamidurafo dotegiraxo se va ken daneksem me di ziliyir, va konafa lovafa keska neke diyir : va vixara va savsaf dodaf greltaf funtereem is seltevafa rieta se ke gadesik is brubef tavereem ke boniarugal. Omavon gu prostewaf vierd, ta tenutcera va jiomaceem Nyerere va talpey ke pako is nelkot va ayafa tixara koplekuyur. Acum ton dotegiraxo warzesikeem va int lospayar. Zobenon gan soka is omelteem mano dotegiraxo pu tawamidusikam va witaf xekeem baton roderaykayar. Divatcera va gunteem ke divadomtara tori kotafa sanelia tiyir abdukaf mukot ke Julius Nyerere.

Ba 14/10/1999 koe London? in awalkeyer.