Ba 13/12/1821 koe Rouen Gustave Flaubert koblir. Va Rouen Hôtel Dieu ropexe inafe gadikye gader. Mali rumeugal gruper va tankomilu ke winkablira lizu va griva ta cobekafa disvera rotison lirder. Bak 2^-aksat ke 1832, koar va Gazafa Reila ke Rouen lize nijur zilkiraf vox gdafimaf. Bak 1834 sutelar va "Art et Progrès" nubasutena fela lize wenhaf warzot se tid yordapa.

Bal idulugal ke 1836, koe Trouville in kakever va Maurice Schlesinger is moekote Elisa inafa kurenikya varze dana va birgafa renara kiewagir. Bata skewera tir xanta ke "Education sentimentale" (1843). Va "Mémoires d’un fou" (1838) tozur. Bak radimifa tanda, va "Rêve d’enfer" is "Main de fer" suter. Ko Colibri rouenafa suterotvirda va "Une leçon naturelle : genre commis" taneaf suterot dere sanegar.

Bak 1840 koo Pyrenees is Corsica Flaubert koyar. Bak radimifa tanda ko Paris rokopafa kotla bendewer. Bak 1842, anton tison tolsandaf, va "Novembre" suter. Vewayanon ta rindera va rokopa, va taneaf siatos ke "Education sentimentale" bokar. Bak 1844 vanlakison va Pont l’Evêque va noglavordava levgar. Katcalayanon gan bata walta, gadikye mea jugemer da va vayara in trenar. Ko Croisset poke Rouen in inkewer.

Bak 1846 va gadikye is berikya Flaubert drasur. Do gadikya daletoe di irubar. Va Louise Colet dan vanpir fertikya kakever. Ta wayotera va inaf noglakolaceem, va jonvielera koe idulafo xo selaropik se savsuted. Bak 1849 ko Roneka do Maxime Du Camp nik in mallapir. Va Misra az Suria? az Beirut az Jerusalem az Rodos az Konstantinopolis? az Atinay? worad. Va "La Tentation de Saint Antoine" jiadar. Bak 1851 ko Sparta is Peloponesos tolmallapir aze va Patra az Brindisi az Napoli? az Roma? az Firenze? worar. Koyara riwe toltandon jijar. Bak 1854 do Louise Colet kaljoar.

Arti tolda, ko "Revue de Paris" virda "Madame Bovary" suten mali 1851 berpot zo sanegar. Tir granafa kiewatca. Golde inafu nuyukamilu konaka nakila ke berpot zo yontad ta onkara va sutesik. Arti tanda Flaubert zo vanbulur. Bak 1858 ta vayara va "Salammbô" warzaf berpot ko Kusantina az Tunus az Carthago? mallapir.

Bak 1869 "L'Éducation sentimentale" zo piskur vexe va rotakafa kiewatca anton kazawar. Bak 4^-aksat ke 1872 Flaubert va gadikya kranavon drasur. Vanolapan, "al sonké mali 15 viel da jinafa kimtafa gadikya tiyir jinaf lodalbayan tisik". Dimpiyison ko Croisset, va "Bouvard et Pécuchet" abdumimaks kobrar.

Arti tolda kaiki sanegara "La Tentation de Saint Antoine" suterot tir rodj. Flaubert kobar vexe sfiannumejer ise noglazegamejer. Bak 1877 ko Paris inkewer ise va "Herodias" jiadar. Bak olgaf is fentaf fentugal ke 1879, Flaubert tir koe Croisset. Va yotcaks va "Boule de Suif" ke Maupassant suter ise dakter da bat berpot tir "bunheragrot".

Ba 08/05/1880 koe Croisset golde akoladilfura levgon awalker, iskeson va "Bouvard et Pécuchet" mejiadayan berpot. Zola is Goncourt is Daudet? is Banville is Maupassant? is Coppée is Huysmans is Hennique is Alexis is Céard ko awalkikxo va in jupad.

• Les Mémoires d'un fou (1838)
• Smarh, vieux mystère (1839)
• Novembre (1842)
• L'Éducation sentimentale (1845) (^1-eaf siatos)
• Par les champs et les grèves (1848)
• La Tentation de Saint Antoine (1849) (1^-eaf siatos)
• Madame Bovary (1857)
• Salammbô (1862)
• L'Éducation sentimentale (1869) (2^-eaf siatos)
• La Tentation de Saint-Antoine (1874) (^2-eaf siatos)
• Le Candidat (1874)
• Trois Contes (Un cœur simple, La Légende de Saint Julien l’Hospitalier, Hérodias) (1877)
• Bouvard et Pécuchet (1881)

• Suteroteem
  • Francavaf suteroteem

Bat teliz tir nuyaf kalkotavaks mal francavaxa ke Calou, l’Ivre de lecture, do inafa neciafa rictara (P. Arguedas)