|
Bak 1812 koe Portsmouth koe Engla? Charles Dickens ve kobliyir. Kali da tir 12-daf rumeilu ve tiyir kalafu. Va waberga jebetesa bak kotafa kaikifa blira bam ve levgayar. Golde erbadanuks yo inafe gadikye ve koflintayar ; va wawiluaklilu Charles ve grupeyer ise miv vanpison dodelik koe sebekasikiiaxe va eaftafi bali ke iaxekobas rumeik se ve kosmayar. Bata bagala ve noveyer da icde wawikeem is copikeem in di suteyer jonte agelton da va takra ke konak celemoy belisik intafa nega se ve tsedayad ise ve gretcayad. Tuke batcoba, Dickens tel losanef ugalaf berpotik va seltafa artazukara se bak Victoriugal koe Engla gorukon ve turestayar. Nekev tunuyara va gadikye, in me davon ten mejeyer. Koe iaxe ware tandamon ve kobayar abdi da ko bema ve rodimpiyir. Inafa gadikya en ve batceyer da va viroyaks in jovleyer.
Ba inaf 24-eaf ilanuk inaf negeem ko "Lordekseem ke Boz" karba ve zo katanayad. Neva ve tiyir davafa kiewatca aze ve askiyir da va zubi ta sutelara va atedafa neva pu in piskusik di drageyer. Ton skulta bak 20 aksat "Eluxa se ke Pickwick" baton ve kozwiyir. Bata neva tir klecafa nega ke stuveem ke opelkaf vundnizdef gijanizdef koredik is Sam Weller inaf kwik is boxo dem anamef diveavik se. Va Dickens kiewatca mea ve buluyur ise koe Engla va warzaf berpot se in verton ve sanegayar. Va inaf berpot se amerikikeem satcon albayar. Tulon, tiyir tari viele tota vanstasa va ironakaf sanegaks se komoltaweyer.
Dickens meviele ve ixeyer pu gadikya dana al yovayar ta koe iaxe in co-zavzayar, azon wetce teza ke akoyadafa is greciafa gadikya koe "Nicholas Nickleby" berpot va inya ve narayar. Koe sanefa bema Charles azon bardon zo uneyer abdi da va ar rundak di trasiyir, batviele wetce unenik koe mwopikaf ilput. Bata kobara tiyir argasa, acum Dickens ve vanpiyir ugaldusik icde Dotamaga. Tison 23-daf, al vanpiyir grupen felusik ise gan Morning Herald vielfela ve zo segeyer. Levi seotara va bat play Dickens toz sorduyur. Bak 1833 va berpotaf teliz icde blira koe London ve stakseyer pu Monthly Magazine dane sanegatar ise va ar se erutur. Va inafa keldaskira Dickens ve ekeyuyur acum yoltoe "Boz" bat warzot se ve zo sanegayad.
Radimi braf "Eluxa se ke Pickwick", vanmiae berpotafa joya kan "Oliver Twist" bak 1838 is "Nicholas Nickleby" bak 1839 Dickens ve linveyer. Bata reizkoraca yo, vegeduyuna aname fereon mivizvaf istef koredik, va lan krilt yo ke savera va tel lodacik se (satcon va rumeik) ixam nedid. Koe "Savsaciaxe" bak 1840, tolon tir folvafi bali ke velikya dani va forndasa rankera va enmeayilu ke rabatamava gan sutesik nover.
Va tulodaludevara va intafa seltafa is swavopafa luzdara Dickens dere kiewaskir. Vanmiae bat suterot se, "Dombey is Nasbeik" sanegayan bak 1848 tir akidaf delt ke bat glastikeem ke dan mo raba tufa zo kolnayar. Vexe va "David Copperfield" inaf suterotap sanegayan bak 1849 nelkon zo gonamir. Bata mivizvafa nega nedisa va kobas is copaf London win gan velaf iteem zavzar tel lokotgrupaf is tel lobelin berpot ke Dickens.
Inafu brilu isu agralilu pu in va sanepilu vodayad. Ayevapaf purik, va intafu kotgrupapilu meviele vanpison radjaf ve impavantayar. Dickens dere tiyir gadesik va wenhasistu wenhuyusu bak 1851 kadime gazik. Wori, va tozurafa waberga ke rumeilu mei ilaf zvakeem kotaf kiewatceem meviele ve rolumisayad. Skedapara va Ellen Ternan jotafa wenhusikya va kurenik is sintaf sanoy nasbeik gan in bak 1858 ve asbuluyur.
In verton laxuyur ise va intaf suterot yo skeweson beliyir, acum va inafu salilu batcoba ve tuacayar. Puskenon, bak 1870 koe tawaday inkewer ta belira va "Bula ke Edwin Drood" titis berpot. Vexe vamosinon, ba 09/06/1870 koe Gadshill ve awalkeyer. Va kotafa tamava bata giva ve tugabenayar. Henry Longfellow amerikaf ezlik ve suteyer : « Va tanoya awalkera ke sutesik nasbasa va lou vanmanhasilu meviele al wí… Kotafa patcta tir sugawalkafa. » Koe ezlikxo koe Wetsminster Ecey in al zo kotawar.
|
|
Ara ava se
 Charles Dickens
|
