Rupa

Gedelik Weltikye tir awalkaf. Su zo adjuber ise su zo kolirdar. Batcoba me weyonar da in va kobara ironokon divrozar ise va intaf pisonasik biager. Va inafa pilkoma gruper voxe pu belisik va razdura taruter. Neke, Gedelik Weltikye givar da intafa awalkera va intafe une wetce ewavasik ke Sultanik danemer.

Ziavik Weltikye, ardilvamoeik, vajkeson da in va veneziakorafa neva birgon yunker, grupeyer da batcoba di kowupepeyer ise va volnapaca yo di koliziyir. Kalion Otman prostewa va kaatoera va geltruca biuyur. Gedelik Weltikye va dokabasik se djuvajken ta bat skes vox vollorbaf lag baton tulijkayar.

Lanon, adjubesik tir vanmiae bat baroy ewavasik, yolton tis Kruba is Bord is Aladay. Ziavik Weltikye pu Ebeltik nutik va kogrupara erur. Battan mal santoldafa koyara askiyina ta illanira va renapane Shekure nasbeikya ke Ziavik levion dimpir. Tel volkalik borerson dakteson va intafa teyka va rodimempana volobliaca al raplekuyur nume divbliweson va tolfozilira anton al trasiyir.

Vexe adjubesik ta vansara va kevudan lingekseem atason va Ziavik tolon tazer. Shekure bam naler da va Ebeltik kurer krede da in va pisonasik katrasir. Dandayanon gan man felbes siak, va Osman Feliik tel feliapik ke sultanafe ewavaxe gukoer, ta da koo pinteem ke grabom se ke bat ewavasik yo va sleda ke gomilasik katrasir.


Sebuks

"Benim Adım Kırmızı" taneon tir ardialberpot dulzas va indvexeem. Denon tid kosik se is tubizik yo is welima va dana xuyavaf kogrupasik gomaer. Neke va milasavsaceem ke mana neginda dere me ikatcur. Va giltayana anuluca isu tanuskuca ke Orhan Pamuk koe inaf kot suteks belisik boreon katcalar.

Va tel berpotap opelon gixut nume sonket da gan jontiktan nega zo pwader. Denon tiyid rupakoredik se voxe dere siluksilukon vakol ok aal ok erba ok miv awalk sedmeon pwades va bifeem. Nelkot va jonpudafa pwadera batlize arton zo platir. Sume Watson ik vrutas pwadesik ke gimbaf ardialberpoteem.

Min kalion narat da ardialevodara, kore afobanhana is artion ascepitesa va belisik, me tir taneaf dlap ke neva. Debaleson va rupa koe Otman Turkia remi XVI^-eafa decemda ugale italiaf yankik yo ke Tolnasbalarugal? va Europa skebud, sutesik va tan inaf gelukaf underawats, va skedeem wal Roneka is Talteka ruer. Va ewavasik yo digis va kotafe brube is kotafa gedeluca ke islamindafa yanba vox dere drolen ok skalten gan listuca is nuyuca is kosmakseem ke italiafa lingera Orhan Pamuk aszirser. Mana mafelara is bata guyuca denon tid lecafa gu coba lazavana ko islamaxo gan ronekaf selt aneyas va koaykara va intaf vodeem ko Turkia? dum arliz. Denon, sultanaf ewavik se va mana nuyuca djumad voxe dabored da bat europaf fitckiraf yanbik se gan cugafa olkuca is gronafa axofera va aliuca is erba zo lizid. Sin va suvesuca va intafa kobara isu grabom se bures va lokulaf is lozolonaf ar vodeem is drages va blitrakopa plataesa va ayik ta lo dulkuca isu moruca dere nedid. Tisiluenvara gomalgrupena gan Taltekikeem batugale inafa wafivuca va boguca is erolasuca moo winta kotlizo faytawer.

Berpot se ke Orhan Pamuk?

Sessiz Ev - Beyaz Kale - Kara Kitap? - Yeni Hayat? - Benim Adım Kırmızı - Kar

• Suteroteem
  • Turkiavaf suteroteem?
    • Orhan Pamuk?