|
Aristofanes tir ellasaf buskaf ezlik kobliyis moni -445 koe Kidatinayos koe Atinay? gola.
Nuvelar da in va tawadayafi saneroti pasuyur, tsunes va widavafe sokasane ba Peloponnisos geja. Aristofanes tir kategirevamaf : sagaf gu prostewa, va voda se dum dili is proyilu is ronjilu lodam warzarieteem galbun gan trakopik se etrakfamaf gu saref nalen lidot rojur. Gaderopon, me klabur da kotviele rokla yo zo raplekud va atinayafi saneroti dilfur. Inafa rietava, kaatoeyena gan Atinay bak medaf gejeem is Maraton, askir da tir kotabaf kevelik va kota gaderopafa ik lidafa ik alkafa ik suterotafa warzaca yo. Batdume intafa volmalhafa dilfura va Sokrates tumilan do "sofievikeem" is ke dan swavilu zo rotuldiner, ik va Euripides? folvaf ezlik pu dan olukafu opelilu ke abdiikeem zo culimer.
Nuvelar da in koe Aigina ewala va tawayap digiyir.
In va savsafa buska, va wigarinda va taneon gaderopaf tandabifeem dem tizafa ilkafa dilfura yo is duskafa ozara se, donon volar. Dum koe ellasafa folva lize koredik yo ton salma ik sveri ik vebra ikz- zo efud, tama, ont dankason va "parabasis" istefi nhabacakipi ont belckaweson ko tegira ont adim rontion gukoeson va disukesik, va benelafa yorda zirser.
Grabom ke Aristofanes va 44 buska zirseyena wali -427 is -390 ruldayar ; anton san-tanoya varafa al kalion artad. Aristofanes va kotcoba is kizeyeem is gaderopaca yo is pilkovik se is sokikeem is dere lorikeem gevanon laoon kodilfur.
In va baroy nasbeik diyir : va Filetairos is Araros is Nikostratos dan se vanpiyid buskezlik.
Bak -427 "Oy Daitaleis" (Lorotasik yo) taneafa wenhaxa va toleafo poradro war. Koe bat taneaf suterot Aristofanes awir dum en tir : va toloy yik koeon ralentason : va gruspenaf is ponkaf gu saref trakopaceem kontol, is ceakaf is sagaf gu prostewaf lidavodeem artol. Remay ke Nefelay buska koeon ixam zo lorder.
"Axarneis" (Axarneik yo) bareafa buska is taneafa kiewatca lanon tid -425 evlafa. Bata wenhaxa wastesa va dimdilira koe Atinay bam kobodapasa do Sparte? tiyir davafa kiewatca is geltrafa buskafa klepatoza.
"Ippeis" (Okoldik yo, -424) buska, kev Kleon caprik pu in va arpeo nasbar, lize buntuyunon icde stibera va wideyarokeem volgunon di kagrupeyer.
Koe "Nefelay" (Suray se, -423) buska, in va trakopa ke Sokrates? nedin ton tel lowupef sofievik balger. Bata wenhaxa va vidjesilu ke Platon? godevrik ke Sokrates pu in vodayar. Battan naleyer da in va asklibura va inaf feliik sanegon zilison icde in va ewavaja al webeyer.
Koe "Irene" (Dili, -421) is "Lisistrate" (-411), alutara se ta dili, in va pakoikeem gu Peloponnisos geja vilatana va Atinay vinter.
"Sfenes" (Vebra se, -422) buska va akoydilu ke atinayafe sane, malheson is iskedason va zolonaceem ugalzese, ranker.
"Batraxoy" (Salma se, -405) wenhaxa kev Euripides zo vodjur. Euripides ke dan folva se, kevie tela se ke Aisxulos?, va griva is lidopa gruspeyed.
Koe "Ornites" (Sveri se, -414), va rietavaf wid kolnayan wale kelt is sid gan sveri se lize me tid gaderopafa rotoda yo ke tawavaf wid ise vansara pu lorikeem anton kredon zo nover, in gestar.
"Eklesiadusay" (Pirdot ke ayikya se, -392) tir malhopara va doevafa is ayikyevafa rietova se tuurmana gan sofievikeem.
"Ploutos" (-388) va solovilu ke dimziliwalera va kulaceem funten koe Atinay nedir.
Moni -386 in awalker.
|
|
Ara ava se
 Aristofanes
|
