|
"Va int egac ta da fu gildec va garif ezlopik, va tan dis va pezteem tazukayan koe volminafe tame peztalene gan abictan".
Siskesik va kotafa tadava, viltes vrutasik ke intafe sare, Pablo Neruda tir tan lozolonaf amerikespanavaf ezlopik. Inafa tanizva nover da gaderopafa is arayafa towara ke decemda zo tolconhukar, ton meeuropaf siak. Inaf grabom wale dank va listilu ke tamava is inaf saneeem is lhumarezlopa pakawer. Sporgaf ezlopik, Pablo Neruda va teykas is viltes grabom isker.
Keskeon, ezlopik is savsaf dobulik, Neruda tir vund dem konak lent. Icde ayilu, ezlopik al tir tulik, noveson da golde geja div Espana ta gelbera ko Chilea? konak celemoy korik al rototceyed, vukteson va jontika gaderopafa acagira. Vexe dere, baalpeyenon is volgivayanon is dison va meki malhopasiki meiu ileaca, va torkik is adjubesik Stalin sisker. Artipon, goldeon miv di ziwideyer. Dere batcoba va merorelvana conhuta al isker…
Nasbeik ke impadimakikye is tavesikya tolaksaton kaiki koblira awalkeyesa, Ricardo Neftali Reyes Basoalto, okon Pablo Neruda, ba 12/07/1904 koe Parral koblir. Koe Temuco widavama koe Araucania ilefa winta rumeugal dilizer. Gan indiafa pofa araya ke gola is anoelapaca ke tuwava is darkapa belcon jijason zo di tcalayar.
Tison sanbardaf, va taneafa ezla yo is vedaxa se in sanegar. Mali 1921 koe Santiago va gaaropa is francava is francavaf suterot vayar kire djuvanpir francavatavesik. Brudison va Jan Neruda? ceskaf ezlopik (1834-1891), va Neruda ikayolt kiblar, aze tuke sanegaks se is ezlanegaks yo kalion tusposawer. Tison sanlerddaf, doleson va konako guto is trula firviyina gan gadikye, va "Crepusculario" taneafa neva dodeson sanegar. Arti tanda : cuisafa Veinte poemas de amor y una canción desesperada.
Bak 3-aksat ke 1921, ta francavavayara ko Santiago in inkewer. Bak 10-aksat, intafo "Canto de la fiesta" koe Kotlafa Galdaboda va Taneadro seotar. Koe Juventus is Claridad kotlafa fela se dokobar ise va artowarafa exaksara yo kevusa va dodelik se is ardial paker.
Bak 1924, ta ektudara va suteroteem in va francavavayara jovler aze, bak 1927 wetce dobulik zo koflir, tison coskaatoesik koe Rangun az Colombo az Batavia (lize bak 1930 va jotafa nederlandikya listafa Maruca kurer) az Singapore (1931) az Kalkatta az Buenos Aires?.
Bak 1932, ko guga dimlapir aze va "Residencia en la tierra" sanegar. Mali 1935, koe Espana? tir coskaatoesik lize do Rafael Alberti? is Jorge Guillén? is nelkon Federico Garcia Lorca? grupeyena koe Buenos Aires non dokalir. Battan tori inafi bli isu grabom di tir gotus.
Bak 1934 Malva Marina nasbeikya koblir. Koe Madrid? kotla in laxar ise ezlanegar. Va Delia del Carril titis toleaf kurenik kakever. Koe Espana? gejabagalar ise va selteva yoter. Moi fascievafa kevmadara ke Franco ba 18/07/1936 az adjubera va Garcia Lorca koe Viznar, vanpir aluteik tori Espanafe Sokasane. Va "Dank ke awalkaf ervolitik se" taneafa gaderopafa ezlapa sanegar acum sol coskaatoerafli zo di nabildar. Bak 4-aksat, do Cesar Vallejo va espanamerikafa lospa ta pomara va Espana is Vangluyaks ke chileaf gruadik se ta arayarojura. Bak 10-aksat, ko Chilea dimlapir lize va "España en el corazón" sutelar. Koe bata neva siskesa va sokasanefa Espana in godelon gorukon kaikar. Azon koo Mexika? is Cuba? is Perua? koyar.
Bak 1938 gadikye awalker. Tison puskeyen is akolaf, Pablo Neruda mea grusuter, live da chileafe bowere puon erur da va emudera va sokasanef gelbesik se ko Chilea in viunsur. Tol-decitoy kan Winnipeg tota va Chilea mal Franca baton di kallapid. Wetce jadif coskaatoesik koe Mexika lize taltevafa bagala dere dilizeyer in bam zo koflir. Va nelkaf rebavaf lingesik se nobar, ise intaf grabom, pilkovon "Canto General", tolon zo koebelgar ise tulozolonawer. Neruda va "Canto en Chile", va taneaf greelt ke "Canto General", bokar. Arte 15 km gee Valparaiso?, va Isla Negra (Ebeltewala) ind luster.
Bak 1940 ko Valparaiso in dimlapir aze ko Mexico? wetce jadif coskaatoesik zo koflir. Bak 12-aksat ke 1941 koe Cuernavaca gan nazievaf dostak zo dilfur. Bak 1942, Malva nasbeikya awalker.
Bak 1945, Neruda wetce pulodik ke lentef kawodaf winkeem zo libur ise vanpir bewik ke chileafo doevafo pako. Inafu saneilu tir datafu. Va liburaf tawuk ke Gonzalez Videla gader, vexe moi libura wetce taneagadesik bak 1946 battan di nijur kevdoevapaf torkik. Neruda koe puloda kan dewitca dem "J’accuse!" kotgrupaf vergumvelt ke Emile Zola kategir. Golde "gugarelmera" flintlanhayanon, va sopera penon divvawar aze loon tandon birgoton blir aze ko Argentina? va Andes rodega remlakir. Koe Europa divbliyinon, ko SSSR is Polska is Magyara is Italia lapir. Va India is Mexika (do Paul Eluard?) dere di worar. Koe Rangun wetce Ad Honorem coskaatoesik zo askir, lize va Josie Bliss jotafa myanmikya zivotcon skedegar.
Bak 1949, Neruda tir bewik ke Tamavaf Dilipirdot koe Paris aze, bak 1950 do Pablo Picasso? va Walvedeyafo Dilidro seotar. Battandon va "Canto General" suteyen bak birgotugal zo sanegar. Koe Chilea suterot davon zo zuker. Jonvieleson koe Italia, koe tana Tirreneo ewala zo sokeragledar. Va Matilde Urrutia blirarenanikya kakever. Va "Cien sonetos de amor" (1959) renezla se ton cugunaykafu listilu inya pu in koswar. Bak 1952 ko Chilea dimlapir aze bak 1954 va "Odas elémentales" sanegar.
Bak 1957 in vanpir taneagadesik va Tutanaks va chileaf suterotikeem. Aze bak 1964 va liburaf tawuk ke retik va sokasanefa taneagadera Salvador Allende? kotron bristur ise va "Memorial de Isla Negra" sanegar lize va dimara va intaf abdiugal is klokera icde loberafu ayilu ruer. Bak 1965, malenglavasik va Shakespeare?, wetce "Doctor honoris causa" (trakuropa is suteroteem) zo porar.
Bak 1969, va in wetce retik va taneagaderalibura doevafo pako dasugdar, vexe joke Allende tanaf retik ke Unidad Popular Neruda ebkar. Radimi libura va Allende, va permikeba koe Franca Neruda naler. Va "La espada encendida" is "Las piedras del cielo" koeon di sanegar, neva se lize adrafu gotuskilu is amlit ke tamava va tela lonoafa muxara zomer.
Bak 1971, Nobel Suterotafo Poradro va inaf grabom sonar. Inafa ironakafa neva se, tulon "La rosa separada", kan undera icde akola is guazilu is awalk zo tcalad. Bak 1972, ebkason va permikeba koe Franca ko Chilea? dimlapir lize koe vedeyafo utiuxo ke Santiago va sanefa porara kazawar.
Bak 1973, va tawuk tori pulodalibura in paker, kabeson va latinamerikaf is europaf suterotikeem ta da chileafa koegeja zo taruter. Ba 11/09/1973, Pinochet is amerikafa CIA va Salvador Allende vetrovgad ise adjubed. Mona ke Neruda koe Santiago zo torsar ise inaf neveem zo koteykar. Ba 24/09, Pablo Neruda sokeragledanon awalker. Vrutasik va folva tazesa va vo is va rujara lubesa mo chileafe sane moi rotinarira gan sayakikeem. Do anoelafa ervolia inafa caxa sokir. Inafa kotawara vanpir leca ke kevotcera kev fascievafu eaftilu. Mal tari dank yo bimiled, kaikawalkon vrutas va kumsetusi ezlaroti.
Bak 1975 "Confieso que he vivido" inafo namio zo sanegar lize va inaf koyareem isu viltereem isu kakevereem isu renareem in bron is krenugon negar.
"Ko yolt, ko kiblanhayan mamtaf yolt, ta da moe jinaf niskeem asankeem dankar, poke bira, viele awalketé zo djukotawá." Pablo Neruda
|
|
Ara ava se
 Pablo Neruda
 Pablo Neruda
 Pablo Neruda
|
