1. Volgiltafi bali tenuwesi ba 24^-da

Koe Montevideo? (Uruguaya?) ba 04/04/1846 viel ke Isidoros Tumtik francagadikkiraf Isidore Ducasse koblir. Gadikye tiyir gardik koe permaxo. Ko Franca bak 1859 pir ta vayara, ko Tarbes reila az Pau olda lize in tir koeik. Azon ko Paris mallapir ta da va « Ecole Polytechnique » egar. Tison 22^-daf, kan Lautréamont Biptik ikayolt, va taneaf "Chants de Maldoror", va volwina ezlavedaxa, dodeson sanegar (8^-aksat 1868). Bak idulugal ke 1869 kotrafa karba di zo sanegar. Azon, kan "Poésies" vergumvelt, va toloyi nevaki ke abdueneva in dere sanegar, ke abdueneva tori "enidafa vox meviele sutetena neva". Golde kotcakola bak 1870 koe Paris awalker. Inaf grabom gan kaikgeltrevikeem di zo ilamsisker. Dum noapaf muxaks va peztakevafa gripokolesuca isu boluca batvielon awir.

2. Maldoror tel gripokolenik

Rune "Chants", Maldoror, gradilik kaatoen kan ayafa laviaca, va copaceem is polas is tisikopaf bibeeem ke redusik viwazer. Tori min awir "zwaf is gebiaf is forteyajkiraf is ton gebiaf art is vozes". Inafa cugafa gwinuca gan in locuynon askir da in wir va mejesuca ke ayikeem is gejeem is akoleem alokon apkas. Tison poiskaf lente ayafolva, gripokolewer aze kev Lorik va tizuca basrodar.

3. Maldoror tel bolatizik

Maldoror bam vanpir kustoleca. Jontazukaf tisik, in va int artazukar ton kiiz ik kancey ik grokjaxok ik ebeltaf loror. Dum sulem ke Tamavatena, va tamava koolanir ise va tawavaxo inafu jaxadasa tizuca tolgenir. Ko nhabuca ik pulvipiks yo tacuke kalaotcewer. Yatkafa oviskuca va blayak se is food yo koakolar ise kotnoelaf rotapstan gradilik batlize tir ta va eaftaf dakteks ke taneaf dank yunker, va : "Jin, askí ta da va lingera va sutkaceem ke udutuca norluca zanudar".

• Les chants de Maldoror (1868)
• Poésies (1869)