Kawabata Yasunari (  川端 康成  Niponavon)

Kawabata Yasunari koe Osaka? kobliyir. Inafe gadikye tiyir selaropik, arayik albas va ezlopa is lingera. Bak 1900 kan kotcakola ve awalkeyer. Yasunari kle ve bliyir do gadikya dana ko neor ke Osaka ve grilizebliyir kali da kanon dere awalkeyer. Yasunari gan gadikyef veygadikeem ve zo emudeyer. Veygadikye tiyir xof korobamik dan va tayaxo ta boara ko leprostewaf ind yo al lusteyer. Vexe rawanuca di tiyir. Wali toleada is pereada, Yasunari soe kalanhon ve bliyir kali awalkera ke veygadikya bak 1906 az berikya bak 1909.

Nekev albara ke veygadikeem, va gracuca ke merosetiken gadikeem in soe ve satoleyer. Va mon 40 afigasuteks ke gadikye digiyir vexe darpe nobafa grilizeblira se vaon koton di drasuyur. Batinde vudesaca yo is klok se kooas va inaf suteroteem ve tozuyud.

Bak anhustda kaiki awalkera ke veygadikya, jotafi Yasunari do guazapafe wiiskafe veygadikye ve zavzayar antaf. Vwepanhafi zokevesiki se waleon ve reduweyed. Bak 1914? persanalubdafe akolafe veygadikye ve awalkeyer.

Battandon, va pone Yasunari ve suteyer. Bate pone ("Shônen" ; Sardik) arti tansanda (bak 1925) ve zo sanegayar. Wetce inaf taneaf suterot zo torigir.

Dene ziavikye Yasunari tevaksaton radimion ve ugalzeyer aze va bemirubaxo ke Ibaragi olda ve koayar. Vanpiyison maxablodik mali 1916, va Kiyono ayikyapaf oyik di goviunsuyur.

Binunon golde niaon torigino alto ise buiveweson da Yasunari tiyir vollistafi, va Kiyono maxagositik koalbayar, ton milikrafamafa albara. Radimi divara ke Yasunari ko Kyoto? bak 9^-aksat 1917, wale toloy yik balemdon toz waltwayar. Koe "Shônen" (Sardik) (1948) bata skeda ve turowinaweyer. Dere tir dulapafa rabatera da doaca yo, rotisa bak bata blirekola vanmiaon ikrafamuca is listucadjumesuca is krenugafa golera, koe "Nemureru bijo" (Kenibesa listikya se) (1960) ik "Mizuumi" (Uzda) (1954) ik "Yama no oto" (Buura ke mevtava) (1949) zo rotrasid.

Vexe bat berpot se poke inafa bagala yo soe leon zavzad kapbure inafa blira dam "Izu no odoriko" (Stutesikya ke Izu) (1926). Bat greelt ke blira ke Kawabata va koyara ko Yugashima bak 1918 vadjer. Bam tison 19^-daf, koe noldakirafa xuta va cuisafa stutesikya in ve kazokeveyer. Icde "Yukiguni" (Nolda Vo) (1935) batcoba dere askir da trakur.

Bak 1919, tolsandaf, va nuyapaf is naf suterotaf rijay in pasur. Koe cavulidebaxo bewik se va sint kazokeved. Va Hatsuyo ve rungrupeyer. Battel, koe inafa nega se kan Michiko yoltayan, tiyir jotafa zanisikya dulapemena gan in. Neke ulidebaxo moimon ve xaayar, acum ko dopewa koe Gifu koe mevtaveem iste Nipona ta irubara do vanikatcus gadikeem inya ve mallapiyir. Nekevon, Yasunari ve trenayar da va inya nobayar aze ve gorayar da di kureyer. Inaf nikeem, givayanon, va egara va kurera ve tcokeyed. Arti aksat, inya va merogrupena kurerajoasa twa pu in ve stakseyer. Batcoba en zo gobelir koe "Nanpô no hi" (Geuf tey) (1923).

Arti tolda geltrafa suterotafa klepa ke Kawabata ve bokaweyer. In grupeyer da va Hatsuyo mea di tolwiyir, wori ko inaf negeem battelya di koingayar. Tori in kaatoeson va rietavikya, mo jontika koredikya asblisa va inaf suterot se, izga di aykaweyer. Wori arti alubda in aron ve kureyer. Vexe damo mana kurera, tira ke Hatsuyo va in veber. Arti santolda, beka gan lantan se bat bif zo torigir dum sordaf milon ede tir koe "Fubo e no tegami" (Twa se pu gadikeem) (1932), in va inya di tolwiyir volse di zo awuzayar.

Inafa lovafa gesta drigdasa va kotunuca ke Hatsuyo bam zo ikapiyir gan gribidganesida ugale in va int di kobibeyer. Luxe ayikyafa ewava suna koe negeem, daletoe me tir tela ke Hatsuyo, joayana gan geltruca, vexe gundaf rietaks kolnan moe inaf ilkaf tacokeem.

Tozi 30 sanda kle tir da va tenafa bliremtrakura zomer : va nhasesa is mekramafa remtrakura, va gestafa tamava lize vanmia inaf kivakseem sordafa listuca aotcewer.

Bak 1968 kan Suterotporadro inaf suteroteem ve zo gableyer. Taneaf niponaf suterotik kazawayas va mana ersklaca. Ba 16/04/1972 koe Zushi poke Yokosuka Yasunari Kawabata ve kseyer.

• Shôkonsai ikkei 招魂際一景 (1921) – Trutca ta porara va awalkaf sayakik se
• Abura 油 (1921) – Punta
• Nanpô no hi (1923) – Geuf tey
• Yubiwa 指環 (1924) - Xiz
• Shiroi hana 白い花 (1924) – Batakafa imwa
• Koji no kanjô (1924) – Peztaka se ke gadiskik
• Yowaki Utsuwa 弱き器 (1924) – Ranaf trig
• Jûrokusai no nikki 十六歳の日記 (1925) – Pone ke jinafa santeveada
• Izu no odoriko 伊豆の踊子 (1926) – Stutesikya ke Izu
• Sobo 祖母 (1926) - Veygadikya
• Kurutta ichipeiji 狂った一頁 (1926) – Oviskafu bu
• Onsen yado 温泉宿 (1926) – Yoridazanisikya se
• Kanjô sôshoku 感情装飾 (1927) – Se ingasiki ke peztaka
• Bôryokudan no ichiya 暴力団の一夜 (1928) – Miel ke yelipik se
• Kokyô 故郷 (1928) - Vo
• Shi to sanbun 詩と散文 (1928) – Ezla is veda
• Shitai shôkainin 死体紹介人 (1929) – Awalkodadafusik
• Asakusa kurenai dan 浅草紅団 (1929) – Asakusa ugaldeem
• Boku no hyôhonshitsu 僕の標本室 (1930) – Jinaf sperteem
• Suishô gensô 水晶幻想 (1931) Vewukbidga se
• Kishi no shi 騎士の死 (1931) – Awalkera ke okollakisik
• Onna wo uru onna 女を売る女 (1931) Dodesikya va ayikya se
• Fubo e no tegami 父母への手紙 (1932) – Twa se pu gadikeem
• Jojôka 抒情歌 (1932) - Alporka
• Chirinuru wo 散りぬるを (1933) – Wavefa grilistawesuca
• Kinjû 禽獣 (1933) – Se sveri is bonol
• Matsugo no me 末期の眼 (1933) – Lodironokafa disukera
• Yukiguni 川端康成 (1935) – Nolda Vo
• Utsukushii tabi 美しい旅 (1940) – Listafa koyara
• Aisuru hitotashi 愛する人達 (1941) – Teleem albas
• Meijin 名人 (1942) - Goograba
• Chichi no na 父の名 (1943) – Yolt ke gadikye
• Shônen 少年 (1948) - Sardikye
• Kotsuhiroi 骨拾い (1949) - Niskatredura
• Embazuru 千羽鶴 (1949) – Suray ke batakafi sveri se
• Yama no oto 川端康成 (1949) – Buura ke mevtava
• Hi mo tsuki mo 水月 (1953) – Tael koe lava
• Mizuumi みずうみ (1954) - Uzda
• Yumiura 弓浦市 (1958) - Yumiura
• Nemureru bijo 眠れる美女 (1960) – Kenibesa listikya se
• Kyôto 古都 (1961) - Kyoto
• Kataude 片腕 (1963) - Ma
• Tanpopo たんぽぽ (1964) - Tciugo
• Yuki 雪 (1964) - Nolda
• Utsukushisa to kanashimi to 美しさと哀しみと (1961) – Gabentuca is listuca
• Kawabata Yasunari-Mishima Yuki'o ôfuku shokan 川端康成・三島由紀夫往復書簡 (1970) – Tweem do Mishima

• Suteroteem
  • Niponavaf suteroteem

Nobel Suterotaf poradroikeem

←  Miguel Ángel Asturias (1967) - Kawabata Yasunari - Samuel Beckett (1969)  →

Bat teliz tir nuyaf kalkotavaks mal francavaxa ke Calou, l’Ivre de lecture, do inafa neciafa rictara (P. Arguedas)