Boris Leonidovitc Pasternak. Rossiaf suterotik. Koblira ba 10/02/1890 koe Moskva?, awalkera ba 30/05/1960 koe Peredelkino poke Moskva.

Nasbeik ke lingesikye is lexusikya, va trakopa koe Moskva kotla (1902-1911) az Marburg tela koe Germana? (1912) az tolon Moskva tela (1915) vayayar. Nekev donafa trakopafa ravera, va trakopa di ebkayar dum va lexa abdion al ebkayar, torion wori inaf tavesik tiyir Skriabin? kotgrupaf lexasik, aze di va ezlopa en koaskiyir. Inafa taneafa ezlaxa se koe guazut bak 1913 zo sanegayad. Moion bak 1914? "Близнец в тучах" (Jelik koe rujodxo) taneaf larm va inafa fitctanuskuca razduyur. Tela lo ezla se ke taneaf koe "Поверх барьеров" (Vamoe lirkeem) toleaf larm bak 1917 zo di tolnarayad.

Batsareon, Pasternak va rossiaf enidevikeem ("Tsentrifuga" lospa) is Mayakovski? inaf tel lofitckiraf pokeayar. Battel zavzatar tan inaf abdualban ezlopik vols tan rietovaf nik. Dokobason do enidevik se, va sinafa plabuca varze pulukafa araya Pasternak me naleyer ; artion, va seramuca ke Mayakovski icde artowarafa tizuca dere me naleyer. Sanegara va "Сестра моя – жизнь" (Jinaf berik bli) bak 1922 pu Pasternak va tana taneafa ema koe patctaf suteroteem ve ravalduyur.

Inafa ezlopa al zo reduyur ise yanba va inafa lukruca al tuacayar. Batcoba tir givanhasa oye da va 1917? ezlaxa se ke neva evlayad. Pasternak va evlavoda sonkeyer ; vexe sedme in, ropplekuwera ke koefa tamava kan xefto ke skewera is ropplekura va tuwavamilbava gan zivotc en tiyid lozolonafa dam seltafa artowara. Koe "Wats yo is amidaca yo" (1923) klita ke larm zo di gruyeyer. Vexe mana artowara wori me tiyir rofrayena gan Pasternak : lezolonafa dam "Сестра моя – жизнь" wori tiyir ironokafa pokolesaca ke witaf ayikeem. Bat envaks gan Pasternak zo muxayar koe alaakafa ezla icde Taneafa Rossiafa Artowara (tela bak 1905?) : "Девятьсот пятый год" (1905 tanda) (1926) az "Лейтенант Шмидт" (Cmidt rikulik) (1927). "Visokaya Bolezn" (Akolapa) (1928) ara ezla va Lyenin? is sare zo ve ektuyur.

Bat "latrarugal" tenuweyer ba "Toleafa koblira" larm (1932) tcalas va betara va listucopa. Pasternak yotcar da vol zo vangruper gan suterotontinikeem. Taneafa ezla ke bata neva pu Buxarin zo tarizayar. Koe munsteks va Taneafa Aba ke Sovietevaf Suterotikeem (1934), battan va Pasternak wetce tan saref lokiewaf suterotik al tualiayar. Pakon batdume azon Pasternak va int ve lanhayar da stivapaweyer ; bak 1930 sanda va ezlaf remsuteks va germanaf is francaf is englaf is sakartvelaf suterotik yo anton ve sanegayar ; vanmiae kalrossiavaf battan se tid Goethe? is Shakespeare? is Shelley? is Keats? is Verlaine? is Slovacki is Petőfi? is Orbeliani is Pacavela. Toloy warzaf nhabaf larm bak geja zo sanegayad : "На ранних поездах" (Koe impadimak ke vanafiz) (1943) is "Земной простор" (Tawavafa darka) (1945). Aze kaiki geja toloya doca : "Stikixi iz romana" (Ezla se mal berpot) (1954) is "Kogda vraz s Gulyatsa" (Viele kieweter) (1956). Miv zavzason Pasternak al betawer : turingawer ise tuaftawer ise tuproyawer ; al videyer va familu tori kontuca dem "nhabaf pwadesik" yo, dana askir da sutesik pu suka ik miel ik muva ik imwa fereon pulvisker ise da mea tir ezlopik pulvis icde tuwava vexe tuwava pulvisa icde int is pu pasus ezlopik.

Pasternak wavepon al toz veduyur. Bak 1922 "Destvo Luvers" (Rumeugal ke Luvers) berpotam az bak 1924 "Severofa joya se" nega az bak 1931 "Kookerelesiki" al zo sanegayad. Wori sutesik torigiyir da "Doktor Jivago" (Jivago Selaropik) (1945-1956) berpot tiyir inaf nelkaf suterot, tel skuks. Kalpouyun koe SSSR? golde da kevartowaracan, bak 1957 koe Italia berpot ve zo sanegayar aze ve zo malrossiavayar kal jontika ava viele bak 1958 Pasternak va Nobel Poradro ve seotayar. Moi sanegara koe SSSR wetce nhukik is toidesik Pasternak ve zo askiper ise kou Cultim dem Suterotikeem ve zo divlapuyur aze ve askiyir da in va Poradro ve ebkayar. Mana plabaca va berpotcek vol maletiyir : tel se nixeas va sutesik koe feleem is bak winugaf katanareem vaon al me beliyid !

Pasternak al ebleyer da va walvedeyafa pomara isu nendara kucilayar ; batcoba stapeyer ta da wetce volnik ke sovietevafa selteva zo torigiyir.

Arti tanda Pasternak awalkeyer.

• Близнец в тучах (1914) - Jelik koe rujodxo
• Поверх барьеров (1917) - Vamoe lirkeem
• Сестра моя — жизнь (1922) - Jinaf berik bli
• Destvo Luvers (1922) - Rumeugal ke Luvers
• Wats yo is amidaca yo (1923)
• Девятьсот пятый год (1927) - 1905 tanda
• Лейтенант Шмидт (1927) - Cmidt rikulik
• Visokaya Bolezn (1928) - Akolapa
• Toleafa koblira (1932)
• На ранних поездах (1943) - Koe impadimak ke vanafiz
• Земной простор (1945) - Tawavafa darka
• Stikixi iz romana (1954) - Ezla se mal berpot
• Kogda vraz s Gulyatsa (1956) - Viele kieweter
• Доктор Живаго (1958) - Jivago selaropik

• Suteroteem
  • Rossiavaf suteroteem

Nobel Suterotaf poradroikeem

←  Albert Camus (1957) - Boris Pasternak - Salvatore Quasimodo (1959)  →

Rossiavaf Nobel suterotaf poradroikeem

1933 Ivan Bunin? - 1958 Boris Pasternak? - 1965 Mixail Coloxov? - 1970 Aleksandr Soljenitsin? - 1987 Iosif Brodski?